AQŞ xärbiläre İranğa qarşı yaña höcüm planın êşli, dip farazlana, şul isäptän "barlıq bombalarnıñ anası" dip atalğan “GBU-43/B” bombasın İrannıñ ênergetika asqormasına häm atom-töş qorılmaların utqa totu öçen qullanu mömkinlege dä bar.
“CNN” bu mäs'älä belän tanış bulğan isemsez AQŞ räsmilärenä sıltama belän xäbär itkänçä, Vaşington administratsiyäse, ägär ilbaşı Donald Trump ara saylawlar aldından yäki annan soñ höcümnärne yañadan başlawğa röxsat itsä, İranğa qarşı “GBU-43/B” (MOAB) bombasın qullanunı qarıy.
Xäbärdä AQŞ arsenalındağı iñ zur atom-töş bulmağan bomba dip äytelüçe bu qoralnı İranğa qarşı berençe tapqır qullanu konflikttağı kiyerenkelekne sizelerlek arttırırğa mömkın dip bilgeläp ütelä, läkin şulay uq anıñ Trampnıñ strategik maqsatlarına ireşüdäge näticälelegenä şik belderelä.
Mäqalädä Tramp xärbilärgä İrannıñ ênergetika asqormasına, şul isäptän, MOABnı qullanu mömkınlegenä qarşı östämä höcüm plannarın äzerlärgä kürsätmä birüe häm İrannıñ atom qorılmalarına höcüm itü plannarı barlığı äytelä.
“MOAB”nıñ "kiñ mäydannı çistaru öçen yaxşı" buluı, läkin tirän ütep kerä torğan suğış başlığı bularaq êşlänmäwe bilgeläp ütelä. Şuña kürä bombanıñ kiñ şartlaw mäydanı tınıç xalıq arasında yuğaltularğa kiterergä mömkin.
Mäqalädä, şulay uq, Trampnıñ “MOAB”nı İranğa qarşı psixologik qoral bularaq qullanuğa östenlek biräçäge turındağı farazlawlar da bar.
