Ukraina Rusiyä köçläre alğa baruçı Zaporojye häm Dnipropetrovsk töbäklärendä suğış sızığında urnaşqan yäşäw punktlarınnan meñnärçä bala häm alarnıñ ata-anasın küçerergä boyırıq birde.

Ukrainanıñ yañadan torğızu ministrı Oleksiy Kuleba, comğa könne “Telegram” aşa yasağan belderüendä: “Xäwefsezlek xäle qatlawlanu säbäple, Zaporojye häm Dnipropetrovsk töbäklärendäge front sızığında urnaşqan 44 toraq punkttan 3 meñnän artıq balanı häm alarnıñ ata-anaların mäcbüri êvakuatsiyäläw qararı birelde”, — dide.

Kuleba êvakuatsiyäneñ Mäskäwneñ berlektäşe Belarus çigendä urnaşqan häm Rusiyä bombalawlarınıñ nişanında bulğan Çernigiv töbägendä dä däwam itüen belderde.

Ministr 1 iyünnän birle front töbäklärennän xäwefsezräk urınnarğa barılığı 150 meñ keşeneñ küçerelüen, alar arasında yaqınça 18 meñ bala häm 5 meñnän artıq xäräkät mömkinlege çiklängän keşe buluın äytte.

Rusiyä 2022nçe yılnıñ fevralendä başlanğan xärbi xäräkätennän soñ Ukrainanıñ sänäğät töbäkläreneñ berse bulğan Dnipropetrovskta alğa baruın dävam itä. Könyaqtağı Zaporojye töbägendä isä anıñ alğa baruı, könçığışqa qarağanda, çiklängänräk bulsa da, soñğı aylarda tizläneş aldı.

Mäskäw soñğı çorda här ike töbäktä dä yaña toraq punktların basıp aluın alğa sörä. Rusiyä 2022nçe yılnıñ sentyabrendä Zaporojye, Donetsk, Lugansk häm Xerson töbäklären üzenä quşuın iğlan itkän ide, ämmä bu töbäklärneñ tulısınça xärbi kontrole astında buluın däğwa itmäde.