İzrail ğäskäre, qamaw astındağı Ğazzädä utnı tuqtatu kileşüen tağın ber tapqır bozıp, öç fälästinlene ütergän.

İzrail armiyäsennän yasalğan belderüdä Ğazzäneñ kön’yağında urnaşqan 188 nçe bronyalı brigada berlekläreneñ “Sarı sızıq” dip atalğan yasalma çikne uzğan häm ğäskärlärgä yaqınlaşqan öç fälästinlene açıqlawı, älege keşelärneñ aşığıç yanaw tudıruı  alğa sörelde.

Belderüdä yanawnı yuqqa çığaru maqsatında “Sarı sızıq”nıñ könbatışında ber fälästinlegä qarata İzrail hawa apparatınıñ höcüm oyıştıruı häm älege keşeneñ  höcümdä üterelüe äytelde.

Ğazzäneñ tön’yağında isä Tön’yaq brigadasına bäyle bereklärneñ “Sarı sızıq”nı uzğan häm İzrail poziśiyälärenä yaqınlaşuı alğa sörelgän berniçä fälästinlene bilgeläwe, bu xälneñ dä aşığıç yanaw dip bäyälänüe citkerelde.

Belderügä qarağanda, İzrail köçläre ut açtı häm höcüm näticäsendä ike fälästinle hälaq buldı.

Bu höcümnär Fälästin sälamätlek saqlaw çığanaqları Ğazzäneñ törle töbäklärendä oyıştırılğan İzrail höcümnärendä ike keşeneñ ülüen, küp sanda keşeneñ yaralanuın xäbär itkännän soñ buldı.

Älege höcümnär 2025 yılnıñ 10 oktyabrendä köçenä kergän utnı tuqtatu kileşüeneñ İzrail tarafınnan küp tapqırlar bozıluınıñ soñğı ürnäge bulıp tora.

İzrail, 2023 yılnıñ oktyabrennän birle Ğazzädä başqarğan genośidta, kübese xatın-qızlar häm balalar bulğan 71 000nän artıq fälästinlene üterde, 171 000nän artıgın yaraladı.

Şulay uq qamaw astındağı töbäkneñ zur öleşen cimerde häm böten xalıqnı yäşägän cirlären taşlap kitärgä mäcbür itte.

Utnı tuqtatuğa qaramastan İzrail höcümnäre däwam itte häm Ğazzä sälamätlek saqlaw ministrlığı mäğ’lümatlarına qarağanda, İzrail 425 fälästinlene üterde, 1 206 keşene yaraladı.