Törkiyä tışqı êşlär ministrı Xaqan Fidan Ğazzä mäs'äläsendä däwam itüçe tınıçlıq tırışlıqlarına öleş kertü öçen “närsä kiräk bulsa, barısın da başqarırğa” äzer buluların belderde.
Ul Qatar başqalasında ütkärelgän 23nçe Doxa forumında Änkaranıñ Ğazzägä ğaskärilär cibärü mömkinlege turındağı sorawğa şulay dip cawap birde.
Fidan Ğazzädä xalıqara totrıqlılıq köçe tözü turında kiñ külämle söyläşülär baruına iqtibarnı yünältep, anıñ niçek urnaştırılaçağı, wazıyfaları närsädän toraçağı häm qayısı qağıydälär buyınça êşläyäçäge turında bäyäläwlär alıp barıluın citkerde.
Ul xalıqara köçneñ wazıyfasına realist qararğa häm kötelgän näticälärne bilgelägändä qayber nüanslarğa iğtibarlı bulırğa täqdim itte, “çönki cirlektä bilgele çınbarlıq bar”.
Östenlekle mäsälä: izraille häm falästinlelärne ayıru
“Minemçä, Xalıqara totrıqlılıq köçen urnaştırğanda bezneñ berençe maqsat — çiktä izraille häm falästinlelärne ayıru bulırga tiyeş. Annan soñ qalğan mäs'älälärne xäl itärbez,” — dip äytte Fidan.
Törkiyä tışqı êşlär ministrı Xalıqara totrıqlılıq köçe täêsirle bulsın öçen politsiya berlege tözelergä häm öyrätelergä, şulay uq, tınıçlıq komitetı qoru öçen regional idarälär barlıqqa kiterelergä tiyeşlegen söyläde.
“Xalıqara totrıqlılıq köçenä qaysı illärneñ qatnaşaçağı anıq qına bilgele tügel, läkin ul urnaştırılğannan soñ protsess êtaplap formalaşaçaq”, dip assızıqladı tışqı êşlär ministrı.
Törkiyä AQŞnıñ aradaşçılıq tırışlıqların xuplıy
Fidan AQŞ ilbaşı Donald Trampnıñ aradaşçılıq häm tınıçlık urnaştıru omtılışlarınıñ Törkiyä mäqsatlarına turı kilüen äytte. Ul Änkaranıñ Ukrainada da, Ğazzädä dä utnıñ tuqtatılın teläwen kabatladı.
Tışqı êşlär ministrı, däwam itüçe Rusiyä-Ukraina suğışına da tuqtalıp, Awrupanıñ üzen nığraq totu öçen tağın da icadi çişeleşlärgä mохтаҗ buluın citkerde.
“Minemçä, bu suğışnı beterüneñ berdänber xälitkeç yulı — yaqlarnı ışanıç belän häm, kiräk bulsa, mäcbüriläp tınıçlıq söyläşülärenä yünältü. Xäzerge waqıtta söyläşülär bara,” — dip belderde ul.
Törkiyä tışqı êşlär ministrı Xaqan Fidan şimbä könne forum qısalarında Qatarnıñ xökümät başlığı häm tışqı êşlär ministrı Şäyx Möxämmät bin Abdulraxman Al Tani belän oçraştı.
Fidan belän Al Tani arasındağı oçraşu turında centekle mäğlümat birelmäde.
Doxadağı ike könlek forum dönya liderları, diplomatlar häm säyäsi êkspertlar qatnaşında “Ğädälät ğamälgä küçä: wäğdälärdän - êşkä” teması astında ütte.
