Amerika Quşma Ştatları İlbaşı Donald Tramp Waşington belän Tähran arasındağı turıdan-turı bulmağan söyläşülär däwam itkän çaqta İrannıñ atom-töş söyläşülärendä "awır xäräkät itüen” häm wazğiyätne tınıç yul belän xäl itü öçen "qurqu"tudırunıñ kiräkle bula alaçağın äytte.
Tramp comğa könne Tönyaq Karolinadağı “Fort Bragg”ta wazıyfalı xärbilär belän söyläşkän çaqta: "Alarğa kileşügä kilü awır buldı. Qayçağında “qurqu” kiräk. Bu – wazğiyätne çınlap torıp xäl itäçäk berdänber närsä”, - dip bilgeläp uzdı.
Şuşı süzlären ul AQŞ räsmiläre ikençe aviayörtkeçneñ Yaqın Könçığışta urnaşuın raslağannan soñ äytte.
Tramp bu adımnıñ söyläşülär uñışsız tämamlanğan oçraqta ilneñ äzer buluın täêmin itügä yünältelgänen äytte.
Tramp şulay uq İranda xökümät alışınuınıñ "bula alaçaq iñ yaxşı närsä” bulaçağın äytte.
Ber jurnalist annan İranda “rejim üzgäreşen” telisezme dip sorağaç, Tramp: “Minemçä, bu mömkin bulğan iñ yaxşı närsä bulır ide”, - dip cawap birde. Ul xäbärçelärgä: "Alar bu xaqta 47 yıl däwamında söylilär. Häm alar söyläşkändä, bez küp keşelärneñ ğomeren yuğalttıq”, - dip östäde.
Basım astında diplomatiya
Moña qädär Tramp İran belän söyläşülärneñ alıp barıluın, läkin bilgesezlek buluın äytkän ide.
Uzğan atnada Oman ike yaq arasındağı söyläşülärdä aradaşçılıq itte.
İran tışqı êşlär ministrlığı süzçese бу êlemtäneñ Tähranğa Waşingtonnıñ citdilegen bäyälärğä mömkinlek birüen häm diplomatiyäne däwam itü öçen citärlek urtaq nigez kürsätüen äytte.
Söyläşülärneñ kiläse êtabı älegä iğlan itelmäde.
Tramp üz çığışında şulay uq uzğan yılnıñ iyünendä AQŞnıñ İran atom-töş qorılmaların bombağa totuın iskä aldı häm monı kiñräk tıyıp toru strategiyäseneñ ber öleşe dip täqdim itte.
Fort-Breggqa säfär qısalarında 3nçe ğinwarda Nikolas Maduronı urlaw operaśiyäsendä qatnaşqan maxsus köçlär belän oçraşu da buldı.
Tramp xärbilärne maqtadı häm alarnıñ ğamällären Amerikanıñ çit illärdäge köçe belän bäyläde.
Anıñ çığışında şulay uq açıq säyäsi belderülär dä bar ide.
Tramp üzeneñ demokrat köndäşlären tänqitläde häm noyabr saylawınnan soñ alar Kongressnı kontroldä totsalar xärbi köçlär köçsezlänäçäk, dip kisätte.
İlbaşınıñ şuşı süzläre Tähran belän söyläşülärne däwam itkändä diplomatiyä häm basım arasındağı balansnı saqlawçı administraśiyä ısulın çağıldıra häm xärbi variantlarnıñ äle dä östäldä buluın kürsätä.
