Törkiyäneñ tışqı êşlär ministrı Xaqan Fidan häm Milli küzläw oyışması başlığı İbrahim Qalın yaña yılnıñ berençe diplomatik söyläşüen Ukraina Milli iminlek häm saqlanu şurası särqätibe Röstäm Umerov belän Änkarada çınğa aşırdı.

Törkiyä tışqı êşlär ministrlığı urtaqlaşqan ber belderügä kürä ministr Fidan belän Umerov pänceşämbe könne küreşep söyläşte.

Tulıraq mäğlümat birelmäde läkin söyläşülär Rusiyä-Ukraina suğışınıñ tuqtawına bulışaçaq ömetläre artqan şartlarda çınğa aştı.

Mäskäw häm Kiyev citäkçelekläre belän xezmät mönäsäbätlären däwam itterüçe Törkiyä konflikt başlanğan könnän birle möhim aradaşçı buldı. Äsirlär belän almaşu häm suğışnı tuqtatuğa qarağan söyläşülärne xupladı.

İminlek çığanaqlarına kürä Umerovnıñ İbrahim Qalın belän söyläşüendä Ukrainadağı iminlek wazğıyäte belän Rusiyä häm Ukrain arasında däwam itüçe konflikt, anıñ regional häm global täêsirläre quzğatıldı.

Taraflar söyläşüdä tınıçlıq urnaştıru adımnarın, söyläşü barışlarındağı soñğı täraqqıyätlärne häm regional şartlarnı iğtibarğa alıp yasala alınaçaq adımnarnı qaradı.

Söyläşülärdä şulay uq Rusiyädä totıluçı Ukrainalı äsirlärneñ irekkä cibärelüe, äsirlär belän almaşu tırışlıqları da urın aldı.

İbrahim Qalın häm Röstäm Umerov xezmättäşlek mexanizmnarı qısalarında Törkiyä häm Ukraina arasında sistematik xezmättäşlekne däwam itterü mäs’äläsendä kileşte.