Törkiyä Cömhüriyäte tışqı êşlär ministrı Xaqan Fidan AQŞnıñ İranğa qarşı ixtimallı höcümeneñ yalğış bulaçağın belderep, Vaşington häm Tähran citäkçeleklären kileşmäwçänleklärne diplomatiyä yulı belän çişärgä çaqırdı.

Fidan, çärşämbe könne “Al Jazeera” kanalına birgän intervyusında, İran belän kiyerenkelek artqan şartlarda AQŞnıñ Yaqın Könçığışqa xärbi köçlär cibärüenä iğtibarnı cälep itte. Ul töbäkara xezmättäşlekneñ möhimlegen assızıqladı häm “suğışnı yañadan başlatu yalğış” dide.

İke il arasındağı qırıs süzlärgä qaramastan, diplomatik çişeleşneñ äle dä mömkin ikänlegen bilgeläp ütkän Fidan: “İran atom-töş dosye mäs'äläsendä yañadan söyläşülärgä äzer,” — dip belderde.

Törek diplomatı AQŞ räsmilärenä İran belän bäyle mäs'älälärne tulı ber paket urınına êtaplap qararğa kiñäş itte. “Amerikalı duslarğa kiñäşem: İran belän bulğan mäs’älälärne beräm-beräm beterü. Atom-töş mäs'äläsennän başlağız, anı yabığız, annarı başqalarına küçegez,” — dide ul.

Xaqan Fidan şulay uq İrannıñ töbäk tärtibendä “iskitkeç urın” ala alaçağın, läkin monıñ öçen kürşe illär belän ışanıç tözü kiräklegenä basım yasadı.

Törkiyä tışqı êşlär ministrı Fidan, törle ideologiylärgä häm mäzhäplärgä qaramastan, töbäk illäreneñ millät-däwlät sisteması êçendä xezmättäşlek başqarırğa mäcbür buluın da assızıqladı.