Törkiyä ilbaşı urınbasarı Cäwdät Yılmaz Törkiyä häm Tönyaq Kipr Törek Cömhüriyäteneñ xezmättäşlekne alğa cibärüne däwam itäçägen häm mart ayı azağına qadär yaña iqtisadi kileşü töziyäçäklären belderde.

Pänceşämbe könne Änkarada Tön’yaq Kipr Törek Cömhüriyäte premyer-ministrı Ünal Üstäl belän oçraşudan soñ jurnalistlarğa belderü yasağan Yılmaz söyläşülärne näticäle dip bäyäläde, yaña iqtisadi häm finans xezmättäşlek qısası östendä êşçänlekneñ däwam itüen äytte.

Yılmaz: ”Bezneñ maqsat açıq. Bez Tön’yaq Kipr Törek Cömhüriyäten küpkä yaxşıraq häm köçleräk kiläçäkkä alıp barırğa telibez”, - dide.

Ul Törkiyä belän Tön’yaq Kipr Törek Cömhüriyäte arasındağı mönäsäbätlärneñ ike il arasındağı ğadäti mönäsäbätlär tügellegen assızıqlap, garant däwlät bularaq Törkiyäneñ Tön’yaq Kipr Törek Cömhüriyäten yaqlawnı däwam itäçägen äytte.

Yılmaz xäzerge xezmättäşlek protokolınıñ näticäle räweştä ğamälgä aşırıluın häm ike yaqnıñ da mart ayı azağına qadär yaña kileşügä qağılışlı söyläşülärne tämamlawnı maqsat itep quyuın citkerde.

Kipr mäs’äläsenä kilgändä, Törkiyä ilbaşı urınbasarı teläsä nindi çişeleşneñ utraw çınbarlığına, ike däwlät häm ike xalıq, suveren tigezlek prinśiplarına nigezlenergä tiyeşlegen belderde.

Tön’yaq Kipr Törek Cömhüriyäte prem’yer-ministrı Ünal Üstäl Kipr törekläreneñ yalgız tügellegen assızıqlap, Törkiyäneñ Tönyaq Kipr Törek Cömhüriyäteneñ töp Watanı bularaq alar yanında toruın belderde.

Üstäl şulay uq utrawda ike xalıq häm ike däwlät buluın häm nindi dä bulsa çişeleşneñ  bu çınbarlıqnı çağıldırırğa tiyeşlegen äytte.