Awrupa Berlege citäkçese Ursula fon der Leyen sişämbe könne AQŞ ilbaşı Donald Tramp belän Ukraina suğışı säbäple Rusiyägä basımnı arttıru öçen östämä çaralar kertü turında söyläşte.
"Min (Tramp) belän Rusiyägä iqtisadi basımnı arttıru öçen urtaq tırışlıklarıbıznı nığıtu turında yaxşı söyläşü ütkärdem," dip yazdı ul “X” platformasında.
Fon der Leyen Awrupa Komissiyäseneñ 2022 yılda Ukrainağa höcüm başlangannan birle Rusiyägä qarata 19nçı sanktsiyä paketın täqdim itärgä äzerlänüen belderde.
Bu paketka kriptoaktivlar, banklar häm ênergiä ölkäsenä qağılışlı çaralar keräçäk, dide ul.
Tizlätü kiräklege turında
Tramp, Mäskäwne cäzalaw başlanğançı, ittifaqtaşlarınnan Rusiyä neften satıp alunı tuqtatunı taläp itte, ä Qıtayğa tamğaxanä tarifları belän bärergä quştı.
27 ilne üz êçenä alğan Awrupa Berlege inde 2022nçe yılda Ukrainağa höcüm başlangaç Rusiyä neften importlawnıñ küpçelek öleşen tıydı häm 2027 yıl axırına qadär Rusiyä nefte häm gazın alunı tulısınça tuqtatu planın äzerläde.
Fon der Leyen Brüsselneñ tizräk xäräkät itärgä teläwenä işarä yasadı.
"Rusiyäneñ suğış iqtisadı qazılma yağulıqlardan kilgän keremnär belän täêmin itelä, Ukraina cirendäge qan qoyunı finanslıy. Moña çik quyu öçen, (Awrupa) Komissiyäse Rusiyä qazılma yağulıqları importın tuqtatunı tizlätü täqdimen kertäçäk," dip ul yazdı.
