İkençe Qarabax suğışında barı tik 44 kön êçendä yaw astındağı cirlären kire qaytarğan Azärbaycan xalıqnıñ buınnar buyı däwam itkän kötkän ömetlären tormışqa aşırıp, tarixi ciñügä ireşte.

Ärmänstan Sovetlar berlege tarqalğannan soñ yawlap alğan cirlärendä 30 yılğa yaqın waqıt däwamında Azärbaycan tınıç xalıqına höcümnär oyıştırdı. 2020 yılnıñ 27 sentyabrendä çik buyındağı awıllarnı awır qorallar belän utqa totuı suğış başlanuına säbäp buldı. Azärbaycan ilbaşı İlham Äliyev boyırığı belän Azärbaycan ğaskärläre şul uq könne cawap operaśiyäsen başladı.

Soñraq «Watan suğışı» dip atalğan operaśiya 44 kön däwam itte. Şuşı däwerdä 5 şähär, 4 rayon häm 286 awıl yawdan azat itelde. Suğışta 2 meñ 908 Azärbaycan ğaskäre hälaq buldı, Ärmänstan höcümnäre näticäsendä 94 ğayepsez keşe ülde.

2020 yılnıñ 8 noyabrendä Şuşanıñ azat itelüe belän Ärmänstan ciñelüen tanırğa mäcbür buldı. 10 noyabrdä Azärbaycan, Ärmänstan häm Räsäy arasında öçyaqlı belderge imzalandı. Belderge nigezendä Ärmänstan ğaskärläre Ağdam, Kälbäcär häm Laçın rayonnarınnan da çigende.

10 noyabr’ - «Ciñü köne» dip iğlan itelsä dä, bu datanıñ Mostafa Kemal Atatörek wafat bulğan köngä turı kilüe säbäple, Şuşanıñ azat itelgän kön — 8 noyabr räsmi «Ciñü köne» bularaq qabul itelde.