Törkiyä ilbaşı Räcäp Täyyip Ärdoğannıñ xäläl cefete Äminä Ärdoğan Gazzädäge balalar belem alu xoquqınnan mäxrüm qalmasın öçen äzerlängän urtaq beldergegä qul quydı.
Äminä Ärdoğan 15 nçe sentyabr’dä Qatarnıñ başqalası Doxada İslam xezmättäşlek oyışması belän Ğaräp Ligasınıñ çirattan tış urtaq sammitında qatnaşqan ilbaşı belän bergä Doxağa kilde häm sammit qısalarında Qatar ämire Şäyx Tämim bin Xamäd Äl Sänineñ änise Şäyha Moza bint Nasır belän oçraştı.
Sammittan soñ Nasır nigez salğan “Education Above All” waqıfı “Bäreleş töbäklärendä yäşäwçe balalarnıñ belem aluı cähätennän iñ naçar yıl” dip atalğan urtaq belderge äzerläde.
Gazzä üzixtiyarıyı bulğan liderlarnıñ xäläl cefetläre, däwlät başlıqları häm xalıqara oyışmalarnıñ yuğarı däräcäle citäkçeläre qul quyğan belderge dön’yanıñ törle poçmaqlarında bäreleşlärdän zıyan kürgän töbäklärdä mäğarif ölkäsendä zur awırlıqlar küzätelgändä häm “Belem alunı höcümnärdän saqlaw xalıqara köne”neñ altınçısı uñayınnan bastırıldı.
Beldergedä krizis töbäklärendäge balalarğa häm mäğarif sistemalarına qarşı däwam itkän xoquq bozularnı tuqtatu öçen tiz arada êşkä kereşergä çaqırıldı.
Dokumentnıñ maqsatı – bäreleş töbäklärendäge balalarnıñ belem alu xoquqı cähätennän iñ naçar yıl dip bäyälängän häm könnän -kön qıyınlaşa barğan xälgä qarşı urtaq totış kürsätü, bigräk tä Gazzädä häm başqa bäreleş töbäklärendä bulğan keşelek fäcigasenä iğ’tibar cälep itü.
Beldergegä Äminä Ärdoğan belän bergä Qatar Mäğarif waqıfı räise häm BMOnıñ Totrıqlı üsеş maqsatları yaqlawçısı Şäyha Moza bint Nasır, Bosniya – Gerśegovina ilbaşı idaräse şurası äğ’zası Denis Beçiroviçnıñ xäläl cefete Mirela Beçiroviç, Kolumbiya ilbaşınıñ xäläl cefete Veronika Alsoser Garsia, Gambiya ilbaşınıñ xatını Fatumatta Bax-Barrou, S’yerra - Leone ilbaşınıñ xatını Fatima Maada Bio, Petra milli waqıfı räise häm YUNESKO mädäni miras yaxşı niyät ilçese prinśessa Dana Firas, Malayziya prem’yer-ministrınıñ xatını Wan Aziza İsmail häm êlekke Şotlandiya töbäk prem’yer-ministrı Hamza Yosıf kebek küp sanda keşe qul quydı.
Äminä Ärdoğannıñ sośial mediadağı belderüe
Äminä Ärdoğan beldergegä qağılışlı “NSosyal” akkauntında bolay dip yazdı:
"2009 nçı ylnıñ 10 nçı ğıynwarında “Fälästindä tınıçlıq öçen xatın-qızlar cıyılışı” qısalarında İstanbulda liderlarnıñ xäläl cefetläre belän cıyılıp, dön’yaga “Gazzägä yärdäm öçen İstanbul çaqıruı”n iğ’lan itkän idek.
2023nçe yılnıñ noyabrendä isä İstanbulda oyıştırılğan “Fälästin öçen ber yöräk” iseme astında liderlarnıñ xäläl cefetläre sammitında Fälästin öçen tağın berläştek.
Bügen qaderle dustım Şäyha Moza bint Nasır citäkçelegendä iğ’lan itelgän “Bäreleş töbäklärendä yäşäwçe balalarnıñ belem aluı cähätennän iñ naçar yıl“ beldergese belän tawışıbıznı şul könnärdäge ışanıç belän tağın işetteräbez.
Telägebez – balalarnıñ yäşäw xoquqları tartıp alınmağan, här bala qaläm, däftär, sıynıfqa iyä bulğan dön’ya. Belem alu belän sälamätlängän balalarnıñ tağın da ğadel kiläçäk tözüenä ışanabız häm barlıq vöcdanlı yöräklärne bu çaqıruğa quşılırğa çaqırabız”.
Äminä Ärdoğannıñ Gazzägä qağılışlı êşçänlege
İzrailneñ 2023 nçe yılnıñ 7 nçe oktyabrennän birle Gazzägä höcümnärendä balalar häm xatın-qızlar da bulğan 65 meñnän artıq keşeneñ ülemenä bitaraf qalmagan Äminä Ärdoğan iniśiativası belän liderlarnıñ xäläl cefetläre 2023 nçe yılnıñ 15 nçe noyabrendä İstanbulda “Fälästin öçen ber yöräk” isemle sammitta cıyıldılar häm Gazzä balaları öçen dön’yağa çaqıru yasadılar.
Cıyılışta Gazzä balalarınıñ qayğı-xäsrätlären beterü häm krizisnı çişü öçen köçle teläktäşlek kürsätelde.
Äminä Ärdoğan ire Räcäp Täyyip Ärdoğan prem’yer-ministr bulğan çorda, 2009 nçı yılnıñ 10 nçı ğıynwarında, İstanbulda oyıştırılğan “Fälästindä tınıçlıq öçen xatın-qızlar cıyılışı”n da citäkläde.
Töbäk illärennän küp sanda liderlarnıñ xäläl cefetläre qatnaşqan cıyılış İzrailneñ Gazzägä höcümnäre köçäygän häm ike atnada yaqınça 800 keşeneñ ğomere özelgän waqıtta uzğan ide. Oçraşuda Äminä Ärdoğan “Gazzägä yärdäm öçen İstanbul çaqıruı”n tribunada uqıdı häm tekst liderlarnıñ xäläl cefetläre tarafınnan bertawıştan qabul itelde.
