Rusiyä saqlanu ministrlığı pänceşämbe könne yasağan belderüendä Ukrainağa qarağan 1214 dronnıñ tön däwamında Rusiyäneñ 20 töbägenä höcüm itüen xäbär itte.
Bu san Rusiyädä moña qädär terkälgän iñ zur höcüm kürsätkeçennän artıp kitte. Ul waqıtta 20 sentyabrdä Ukraina 1110 dron qullanğan ide.
Ministrlık belderüendä: «Hawa höcümennän saqlanuçı berleklär tön buyı Ukrainağa qarağan 1214 qanatlı dronnı bilgeläp, yuq itte», — diyelä.
Mäskäw mêrı Sergey Sobyanin beldergänçä tön däwamında başqala töbägenä 613 dron yünälgän.
Sobyanin Rusiyäneñ “Max” sośial çeltärendä yasağan belderüendä bolay dip yazdı: “Alarnıñ zur öleşe şähärgä äle yaqınlaşqançı uq saqlanu ministrlığına qarağan hawa höcümennän saqlanu sistemaları tarafınnan täêsirsez xälgä kiterelde.”
Sobyanin älege waqıt eçendä Mäskäwgä yaqınlaşqan 231 dronnıñ yuqqa çığarıluın belderde.
Rusiyäneñ grajdan aviaśiyase agentlığı “Rosaviaśiya” «oçış iminlegen täêmin itü» maqsatı belän Mäskäwdäge Vnukovo, Domodedovo häm Jukovskiy aêroportlarında oçqıçlarnıñ töşep utıruına häm kütärelüenä waqıtlıça çikläwlär kertelüen xäbär itte. Älege çikläwlär soñraq ğämäldän çığarıldı.
Hawa xäräkäten kontrol' itü xezmätendäge ber çığanaq “TASS” xäbär agentlığına beldergänçä Vnukovo aêroportında kertelgän çikläwlär säbäple İstanbuldan Mäskäwgä oçqan ike oçqıç kire borılıp, İstanbulğa töşep utırğan.
Xäbärgä kürä Rusiyäneñ tağın 18 şähärendäge aêroportında da çikläwlär kertelgän.
