Rusiya tikşerü komitetı comğa könne Mäskäwdä bilgesez höcümçe Rusiya xärbi küzläw wäqalätlesenä atqannan soñ kiñqırlı tikşerü başlanuın häm höcüm itüçene êzläw baruın belderde.

Komitet süzçese Svetlana Petrenko äytüençä, bilgesez keşe general - leytenant Vladimir Alekseyevqa Mäskäwneñ tön’yaq-könbatışındağı yortı aldında  berniçä tapqır ata häm qaça.   

Alekseyev 2011 nçe yıldan birle ilneñ iñ köçle häm yäşeren qurqınıçsızlıq organnarınıñ berse bulğan Rusiya ğomum ştab räislegeneñ küzläw idaräse citäkçeseneñ berençe urınbasarı bulıp êşli.

Petrenko “Telegram”da yasağan belderüendä üterü omtılışı häm qoral kontrabandası ğayepläwläre buyınça cinayät’ êşe quzğatıluın belderde.

“Tikşerüçelär häm sud-mediśina belgeçläre xäzerge waqıtta waqıyğa urınında êşli, küzätü kameraları yazmaların qarıy, şahitlardan sorawlar ala”,- dip belderde ul.

Bu höcüm Rusiya cirendä yuğarı däräcädäge ofiśerğa höcüm itüneñ berençe oçrağı tügel.

Tikşerü komitetı mäğ’lümatına qarağanda, uzğan yıl dekabr’ ayında Rusiya ğomum ştab räislegeneñ  Operativ äzerlek bülege citäkçese general-leytenant Fänil Särvärov Mäskäwneñ kön’yağında  avtomobile astına urnaştırılğan şartlatqıç şartlaw näticäsendä hälaq bulğan ide.