Ukraina ilbaşı Volodimir Zelenskiy Kiyev, Mäskäw häm Vaşington citäkçelekläre Äbu-Dabidä dürt yıl baruçı suğışnı tuqtatu çaraların qarağan waqıtta Ukrainanıñ Rusiyä belän äsirlär almaşuın yaqın kiläçäktä kötüen äytte.

Çärşämbe kiçen yasağan video-möräcäğätendä Zelenskiy, Berläşkän Ğäräp Ämirleklärendä ütkärelgän öç yaqlı söyläşülärneñ soñğı turı belän Ukraina häm AQŞ räsmi zatları arasındağı söyläşülär turında üz törkemennän brifing aluın belderde.

Zelenskiy: “Söyläşülärneñ waqıtlıça näticälären bäyälädek. İrtägä däwam itäçäklär. “Şulay uq möhim ber adım bulaçaq: yaqın kiläçäktä xärbi äsirlärne almaşu kötelä. Äsirlär öylärenä qaytarılırğa tiyeş,” – dide.

Ul äsirlär belän almaşunıñ küläme yäki waqıtı turında tulıraq mäğlümat birmäde.

Rusiyä häm Ukraina äsirlär belän soñğı tapqır 2025nçe yılnıñ 2nçe oktäbrendä almaştı. Ul yılnıñ başında İstanbulda kileşülär tözelgän ide.

Soñğı belderülär Äbu-Dabidä çärşämbe könne başlanğan häm pänceşämbe köne däwam itüçe ikençe tur söyläşülär waqıtında yasaldı.

Berençe ike könlek söyläşülär 23–24nçe ğıynwar könnärendä yänä Berlӓşkӓn Ğaräp Ämirlekläre başqalasında ütkärelde häm AQŞ qatnaşında çınğa aştı.

Kiyev häm Vaşington söyläşülärne “konstruktiv” (näticäle) dip bäyäläsä dä, Mäskäw citäkçelege söyläşülärneñ konstruktiv räweştä başlanuın, läkin “möhim êşlärneñ” äle dä däwam itüen qabul itte.

Söyläşülär älegä tağın da zur barışqa kitermäsä dä, ixtimallı äsirlär belän almaşu konkret gumanitar adım bulır ide.