İran mediasına kürä İnqıylab Saqçıları strategik ähämiätkä iyä bulğan Ormuz buğazın barlıq köymälär öçen yabuın häm bu su yulın qullanırğa cıyınğan härtörle köymäneň utqa totılaçağı turında kisätte.

“Reuters” xäbär itüençä, düşämbe könne cirle matbuğatta çıqqan belderüdä, İnqıylab Saqçıları başkomandirınıň ölkän kiňäşçelärennän İbrahim Cabari, Ormuz buğazınıň yabıq buluın häm annan ütärgä cıyınğan köymälärne utqa totaçaqların citkerde.

Cabarineň däwlät matbuğatında tübändäge süzläre urın ala:
"Buğaz yabıq. Ägär dä berse ütep qarasa, İnqıylab Saqçılarınıñ häm diňgez
flotınıñ qaharmannarı ul köymälärne utqa totar."

Älege adım ğämälgä aşırılsa, dönyadağı neft eksportınıň yaqınça
biştän ber öleşe ütkän tar buğazda säwdä köymäläre xäräkäte tuqtap qalaçaq.

Ormuz buğazı - Farsı qultığın Ğaräbstan diñgezeneñ Oman qultığı belän totaştıra, monnan dönya nefteneñ yaqınça biştän ber öleşe ütä.

Buğaznıñ tönyäğında İran urnaşqan. Bu marşrut aşa ütüçe tankerlar Soğud Ğaräbstanı, Kuveyt, Ğıyraq, Qatar, Baxreyn, Berläşkän Ğaräp Ämirlekläre häm İrannnan neft häm gaz taşıy. Bu neftneñ zur öleşe Aziyağa cibärelä.

Buğazdağı härtörle tuqtap qalu neft säwdäse öçen qaqşatuçı näticälärgä kiterergä mömkin.

İnvestiŝion idarä şirkäte “Neuberger Berman”nıñ ölkän menedjerı Xaqan Kaya: “Qurqınıç astında bulğan närsäneñ zurlığın bäyäläp bulmıy," — dide.

Kaya äytüençä, ber yäki ike atna däwam itäçäk öleşçä äkrenäyüne neft şirkätläre kütärä alsa da, ber ay yäki annan da ozağraq däwam itäçäk tulı yäki tulığa yaqın yulnı yabu, düşämbe könne 70 dollar tiräsendä bulğan êşkärtelmägän neft bäyälären öç urınlı sannarğa kütäräçäk.