AQŞ Senatı däwam itüçe xökümät êşçänlegen tuqtatıp torunı beterü öçen Wäkillär Palatası qabul itkän proyektqa kirtä quydı.

Senat bu qanun proyektın 12 nçe tapqır kire qaqqannan soñ Êşçänlekne tuqtatıp toru çärşämbe  22 nçe könenä kerde.

Senat çärşämbe könne ütkärgän tawışqa quyuda xökümätne 21 noyabr’gä qadär finanslawnı maqsat itkän Wäkillär palatası proyektın 54kä qarşı 46 tawış belän kire qaqtı.

Tawışqa quyu Demokrat senator Jeff Merkley AQŞ ilbaşı Donal’d Tramp räislegenä protest belderü öçen Senat tribunasında 22 säğat’tän artıq däwam itkän çığışın tämamlağannan soñ ütkärelde.

Senatorlar Catherine Cortez Masto, Angus King häm John Fetterman proyektnı yaqlağan Cömhüriyatçelärgä quşıldı. Senator Rand Paul isä proyektqa qarşı tawış birde.

AQŞ tarixında ikençe oçraq

Çärşämbe könne 22 nçe könenä kergän bu krizis, 1995–1996 yıllardağı finanslaw özeklege säbäple bulğan xökümät êşçänlegen tuqtatıp toru oçrağın uzıp kitep, AQŞ tarixındağı iñ ozın ikençe oçraq buldı.

Krizis 1 oktyabr’dä  federal’ çığım östenlekläre turında söyläşülär tuqtalğannan soñ başlandı.

Şul waqıttan birle meñlägän federal’ xezmätkär tüläwsez yalğa cibärelde yäisä xezmät xaqın almıyça êşli.  

Bu çorda xökümät xezmätläre çiklände yäisä tuñdırıldı.