Kolumbiya soñğı un yıl êçendäge iñ zur kokain operatsiyäse uzdıruın rasladı. Wäqalätlelär citkergänçä, ilneñ Tın okeandağı töp portında 14 tonna kokain konfiskatsiyälängän. Bu waqıyğa Vaşingtonnıñ Bogotanı narkotiklarğa qarşı citärlek çaralar kürmäwdä ğayeplägän çorda buldı.

Kolumbiya saqlanu ministrlığı xäbär itkänçä, kokain ambarda distälärçä 50 kilogrammlıq qapçıqlarda saqlanğan, anı tapmasınnar öçen gips belän qatnaştırğannar.

İlbaşı Gustavo Petro monıñ Kolumbiya politsiyase tarafınnan soñğı un yılda qulğa töşerelgän iñ zur küläm buluın äytte .

Operatsiya könyaq -könbatışta urnaşqan Buenaventura portında uza - ul kokain cibärü öçen strategik çıgu noqtası sanala. Operatsiya waqıtında ber genä ülem -kitem dä bulmawı açıqlandı.

Dönyanıñ iñ zur kokain citeşterüçe bulğan ildäge bu basqın Aq Yortnıñ Petro idaräsenä finans sanksiyälär belän yanağan häm Kolumbiyanı AQŞ liderlığındağı narkotiklarğa qarşı köräş berlektäşläre isemlegennän çığarunı kön üzägenä quyğan çorda başqarıldı.

Xökem itmiçä cäzağa tartular

Petro AQŞ ilbaşı Donald Trumpnıñ narkotiklarğa qarşı köräş strategiyäsen açıq räweştä tanqıytläde. Ul Karib diñgeze häm Tın okeanda narkotik taşuı uylanılğan köymälärne utqa totunı ”xökemsez cäzalaw” dip atadı.

Kolumbiya daimi räweştä koka üsterü häm kokain citeşterü ölkäsendä üzeneñ yıllıq rekordların yañartıp tora.

Berläşkän Millätlär Oyışmasınıñ 2023nçe yılğı sannarı buyınça, xäzer Kolumbiyada yaqınça 253 meñ gektar koka basuları bar häm, kim digändä, 2 600 tonna kokain citeşterelä.

Petro AQŞnıñ mömkin sanksiyälären ğädelsez dip atadı häm küp basqınnarnıñ anıñ xakimiyäte waqıtında başqarıluın assızıqladı.