İtaliyädä meñlägän keşe Gazzägä yärdäm alıp barğan flotqa yaqlaw belderü öçen uramğa çıqtı.
Rizasızlıq belderü çaraları ğomum êş taşlaw aldınnan uzdı, ä xökümät ber kön êlek İzrailneñ Gazza blokadasın özü omtılışın tänqıyt’lägän ide.
Rimda poliśiya yaqınça 10 meñ keşeneñ Kolizeydan şähär üzägenä qadär yörep, prem’yer-ministr Djordja Melonineñ İzrailgä yaqlaw kürsätüenä protest belderde.
Protest çaraları Milan, Torino, Florenśiya häm Bolonyağa da taraldı.
Milanda yaqınça 5 meñ keşe Duomo tiräsendä cıyılıp, iñ tığız waqıtta transport xäräkäten tuqtattı.
Protestçılar: "Bez bar närsäne dä tuqtatırğaa äzer. Genośid maşinası xäzer tuqtatılırğa tiyeş”,– dip qıçqırdılar.
Timer yulı operatorı Trenitalia Florenśiya häm Bolonyada protestçılar timer yullarnı basıp alğannan soñ poezd xäräkäte tuqtatıluın rasladı.
Êş taşlaw häm qulğa alular
İtaliya hönärçelär berlekläre Unione Sindacale di Base (USB) citäkçelegendä comğa könne ğomumi êş taşlaw çarasına çaqırdı.
Hönärçelär berlege: "İzrail xalıqara xoquqnı boza. Bar närsäne bloklaw waqıtı citte”,– dip belderde.
Meloni, pänceşämbe irtäsendä, İzrailneñ flottağı 40 İtaliya watandaşın qulğa aluın äytte.
Meloni jurnalistlarğa: "Älbättä, bu keşelärneñ iñ qısqa waqıtta İtaliyägä qaytuın täêmin itü öçen qulıbızdan kilgän bar närsäne êşläyäçäkbez," – dide, läkin "Bolarnıñ barısı da Fälästin xalqına bernindi fayda da kitermi", – dip tä östäde.
Global’ Sumud flotında ike İtaliya xalıq ışanıçlısı häm ike ital’yan Awrupa Parlamentı äğ’zası dä bar.
Oyıştıruçılar flotnıñ xalıqara sularda qanunsız räweştä höcümgä duçar buluın belderä.
Çiktän tış uñçı koaliśiyäne citäkläwçe Meloni êlegräk flotnı qurqınıç, cawapsız ğamäl dip atağan ide.
Meloni sişämbe könge interv’yusında konvoynı tuqtatırğa häm AQŞ ilbaşı Donal'd Trampnıñ İzrailneñ Gazzädäge suğışın tuqtatu planına qurqınıç tudırmasqa çaqırğan ide.
