Binyamin Netanyaxu Vaşington belän Tähran arasında kiläçäktä bulırğa mömkin bernindi kileşüneñ İzrailneñ Livandağı suğışın tuqtatmayacağı turında AQŞnıñ yuğarı däräcäle räsmi zatlarına belderde.

“Israel Hayom” gazetı Netanyaxunıñ bu yullamanı AQŞ ilbaşı Donald Tramp idaräseneñ yuğarı däräcäle wäkilläre belän yabıq işeklär artında ütkärelgän soñğı söyläşülär waqıtında citkerüen yazdı.

Gazetqa kürä, Netanyaxu AQŞ belän İran arasında ireşeläçäk kileşüneñ Livan frontında qabatlanmayaçağın äytte.

Xäbärdä citkerelgänçä, Netanyaxu: “Tramp belän İran räsmiläre arasında kileşü bulsa da, İzrail “Xizbulla”nı yuq itü mömkinlegennän faydalanunı däwam itäçäk”, — digän.

Şulay uq, gazet Netanyaxunun Fransiyä ilbaşı Êmmanuêl Makronnıñ wäzğiyätne çişärgä yärdäm itü wäğdäsenä cawap bularaq “Xizbulla”ğa qarşı suğışnı tuqtatu täqdimen kire qaguın yazdı.

Gazetqa mäğlümat birgän yuğarı däräcäle İzrail räsmie AQŞnıñ Netanyaxu pozitsiyäsen qabul itüen äytte. “Livan ilbaşı Tramp öçen möhim tügel”, — di ul.

İzrailneñ qorı ciröste operatsiyäse

“Xizbulla”nıñ 2 martta İzrail-AQŞ höcümendä ul waqıttağı İrannıñ ruxi liderı Ali Xamaneynıñ üterelüenä cawap birüennän soñ, İzrail Livanğa hawa höcümnäre yasadı häm qoru ciröste operatsiyäsen başladı.

Livan räsmiläre İzrail höcümnärendä, kim digändä, 1247 keşeneñ hälaq buluın häm 3690 keşeneñ yaralanuın belderde.