Amerika Quşma Ştatları Ğazzädä totrıqlılıq urnaştıru öçen urtaq êş törkeme qısalarında 200 xärbi cibäräçäk, ämma Fälästin töbägendä Amerika xärbiläre bulmayaçaq, dip belderde AQŞnıñ ike yuğarı däräcäle räsmie.
Räsmilär, üz isemnären atamıyça, pänceşämbe könne jurnalistlarğa şundıy mäğlümat birde: bu 200 xärbi wazıyfa başqaruçı törkemneñ üzägen täşkil itäçäk häm alarğa Misır armiyäse, Qatar, Törkiyä häm, möğayen, Berläşkän Ğäräp Ämirlekläreneñ wäkilläre dä quşılır dip kötelä.
Räsmilär äytüençä, AQŞ xärbiläreneñ töp urnaşu urını älegä bilgelänmägän, ämma alar urtaq idarä üzäge buldırıp, Ğazzädä wazıyfa başqaraçaq başqa iminlek köçlären integratsiyäläyäçäk häm İzrail köçläre belän kileşmäwçänleklärne buldırmas öçen koordinatsiyä alıp baraçaq.
“Ğazzägä AQŞ xärbilären cibärü niyäte yuq,” dip belderde räsmilärneñ berse.
Räsmilär äytüençä, Ğazzä kileşüe ğamälgä kerügä, töbäktäge kiyerenkelekne kimetü häm İzrail belän ğäräp illäre arasında mönäsäbätlärne cayğa salu öçen şartlar tudıru kötelä.
AQŞ ilbaşı Donal’d Tramp üzeneñ berençe möddätendä İzrail belän Bäxreyn, Berläşkän Ğäräp Ämirlekläre, Marokko häm Sudan arasında mönäsäbätlärne cayğa saluçı “Avraam kileşüläre” tözegän ide.
