Törkiyä ilbaşı Räcäp Tayyip Ärdoğan Rusiyä däwlät başlığı Vladimir Putin belän oçraşuında Rusiyä – Ukraina suğışın tämamlaw öçen alıp barıluçı tınıçlıq söyläşülären yaqınnan küzätüen häm Änkaranıñ bu söyläşülärne üzendä qabul itärgä äzer buluın belderde.

Ärdoğan belän Vladimir Putin Törekmänstannıñ başqalası Aşxabadta uzuçı Xalıqara Tınıçlıq häm Işanıç forumı qısalarında oçraştı. Alar ikeyaqlı mönäsäbätlär häm Ukraina belän suğışnı tämamlaw öçen kiñ külämle tınıçlıq tırışlıqların qaradı.

Ärdoğan suğışnı “ğadel häm totrıqlı solıx” belän tögällaw öçen yasalğan tırışlıqlarnıñ qıymmätle buluın belderde häm ike yak öçen praktik fayda kiterä alğan ölkälärdä üçeşkä ireşü mömkinlegen bilgeläde.

Ul kübräk ênergetika qorılmaların häm portlarnı üz êçenä aluçı çiklängän utnı tuqtatunıñ faydalı bulaçağın äytte.

Ärdoğan Änkaranıñ suğışnı tämamlaw maqsatında alıp barıluçı söyläşülärne yaqınnan küzätüen häm “bu çaralar qısalarında barlıq formatlarda söyläşülärne üzendä ütkärergä äzer buluın citkerde.

Putin forumda ayırım çığış yasap, däwlätara mönäsäbätlärne BMO Xartiyasınıñ prinsipları belän turı kiterü möhimlegen assızıqlap ütte häm Törekmänstannıñ balanslı tışqı säyäsät belän regionnıñ totrıqlılığına kertkän öleşen yuğarı bäyäläde.

Ike lider, şulay uq, Fälästin häm Süriyädäge wäzğıyät, Könyaq Kafkazdağı tınıçlıq protsessın alga cibärü mömkinlekläre turında söyläşte.

Ärdoğan säfäre barısında Törekmänstan ilbaşı Särdar Bärdemöxämmädov häm tağın berniçä räsmi zat belän oçraştı.