Fälästin xökümätenä bäyle ber oyışma düşämbe könne yasağan belderüdän kürengänçä yaw astındağı Yordannıñ könbatış üzänlegendä İzrail armiyase häm qanunsız kilep urnaşuçılar iyul ayında fälästinlelär häm alarnıñ mileklärenä 2 meñ 256 höcüm oyıştırğan.
Fälästinneñ toraq punktları komissiyaseneñ aylıq xisabına qarağanda, höcümnärneñ 1458 en İzrail armiyase, 798 en isä qanunsız kilep urnaşuçılar tormışqa aşırdı.
Komissiya başlığı Muayyad Şaaban beldergänçä armiyaneñ höcümnäre küpçelek Ramalla häm el-Birähdä (260), Nablusta (247), Cenindä (190), Beytüllahimdä (185) häm Al Halildä (170) bulğan.
Qanunsız kilep urnaşuçılarnıñ höcümnären «rekord häm moñarçı kürelmägän» dip bäyälägän Şaaban, Nablusta 228, Al Halildä 212 häm Ramalla belän el-Birehtä 153 oçraq terkälüen äytte. Şaaban bıyıl qanunsız kilep urnaşuçılarnıñ 4 meñ 286 höcüm oyıştıruların da citkerde.
Şaaban iyul ayındağı höcümnärdä cide fälästinleneñ ğomere özelüen, bolardan dürteseneñ Nablusnıñ könbatışındağı Tell awılına qanunsız kilep urnaşuçılar oyıştırğan höcüm waqıtında üterelüen belderde.
Xisapqa qarağanda, izraille qanunsız kilep urnaşuçılar 3 meñ 241 zäytün ağaçın da kertep, 5 meñ 27 ağaçnı tamırınnan yolqıp aldı, zıyan saldı yäki ağuladı, Fälästın milegenä häm awıl xucalığı cirlärenä 440 höcüm oyıştırdı. Şulay uq 23 oçraqta Fälästın mal-mölkäten urlaw yäki qulğa töşerü ğämällären tormışqa aşırdı.
