İndoneziyäneñ Könçığış Yava töbägendäge Semeru yanartawı çärşämbe könne biş tapqır şartladı häm  1.000 metr biyeklekkä qadär vulkan köle atıp çığardı.

“Antara” xäbär agentlığı beldergänçä, berençe şartlaw cirle waqıt belän 12 säğat’ 28 minutta bulğan häm köl bolıtları yaqınça 600 metr biyeklekkä kütärelgän.

Töse aqtan sorığa üzgärgän köl bolıtı urtaça köçtä bulğan häm tön’yaqqa taba küçkän.

Semeru Küzätü noqtası xezmätkäre Liswanto cirle waqıt belän irtänge 5 säğat’ 36 minutta iñ köçle şartlaw terkälüen, kölneñ 1.000 metrğa qadär kütärelüen häm tön’yaq-könçığışqa taba xäräkät itüen beldergän.

“Antara” mäğ’lümatlarına qarağanda soñğı şartlaw irtänge 8 säğat’ 6 minutta bulğan. Şartlaw maksimal’ 22 millimetr zurlığındağı seysmograf terkäwe belän açıqlanğan häm 125 sekund däwam itkän.

Belgeçlär qaynar bolıtlar häm lava ağımnarı yanartaw tübäsennän 17 kilometrğa qadär barıp citü qurqınıçın assızıqladılar , töbäk xalqın Besuk Kobokan yılğası yarınnan kim digändä 500 metr yıraq torırğa kisättelär.

İndoneziyä seysmik xäräkätlär köçle bulğan Tın okean “Ut bocrası”nda urnaşqan häm anda 120dän artıq aktiv yanartaw bar.