Pol’śa tışqı êşlär ministrı Radoslav Sikorskiy uzğan atnada Pol’śa hawa kiñlegen bozğan Rusiya pilotsız oçu apparatlarınıñ, tulayım suğış maqsatı bulmasa da, NATOnıñ reakśiyäsen sınap qaraw maqsatında buluın äytte.
Sikorskiy ingliz “Guardian” gazetına yasağan belderüendä:
— “Qızıq, ämma alarnıñ barısı da uñışsız buldı, bu Rusiyäneñ suğış başlağançı bezne sınap qararğa teläwen kürsätä”,- dide.
Yakınça 19 pilotsız oçu apparatınnan barı tik 3-4eneñ genä bärep töşerelüe turındağı tänqıyt’lärne kire qaqqan Sikorskiy
“Pilotsız oçu apparatları maqsatlarına ireşä almadı häm mileklärgä bik az zıyan saldı; berkem dä yaralanmadı. Bu xäl Ukrainada bulsa ide, Ukraina bilgelämälärenä kürä 100% uñış itep sanalır ide”,- dide.
Sikorskiy, ülemnär bulğan oçraqta, Varşavanıñ cawabı tağın da kisken bulaçağın assızıqladı.
“Xata tügel”
Sikorskiy Trampnıñ “Rusiyäneñ hawa kiñlegen bozuları xata bula ala” digän süzlären kire qaqtı.
“Ber yäisä ike pilotsız oçu apparatınıñ maqsattan taypıluına ışanırğa bula, läkin ber tön êçendä 7 säğat’ däwamında 19 xata? Ğafu itegez, min moña ışanmıym”,- dide ul.
Rusiya isä Pol’śanı maxsus räweştä nişan itep alu däğ’waların kire qaqtı.
Sikorskiy X platformasında yasağan belderüendä Mäskäwne qapma-qarsı belderülär yasawda ğäyepläp:
“Rusiya xökümäte pilotsız hawa apparatlarınıñ Pol’śa hawa kiñlegen yalğış qına bozuın alğa sörgändä, Rusiyäneñ BMO daimi wäkile Rusiya dronnarınıñ fizik räweştä Pol’śaga barıp citä almayaçağın äytä. Bez qayıs rus yalğanına ışanırğa tiyeş?”— dip yazdı.
NATO, comğa könne yasağan belderüendä, könçığış blogına tağın da kübräk xärbi oçqıç urnaştırıp kiläçäktäge pilotsız oçu apparatı höcümnärenä qarşı saqlanu köçen arttıraçağın citkerde.
