İlbaşı Xose Xeri başqala Lima häm kürşe Kalyaoda cinayätçelekne kimetü maqsatı belän 30 könlek ğadättän tış xäl iğlan itte.

Sişämbe könne Ministrlar şurası tarafınnan raslanğan iminlek çaraları tön urtasında ğamälgä keräçäk häm qayber konstituŝion xoquqlarnı waqıtlıça tuqtataçaq. Bu iminlek köçlärenä urtaq patrullär ütkärü mömkinlege biräçäk.

“Bez cinayätçelekkä qarşı köräştä saqlanu poziŝiyasennän höcümgä küçäbez. Bu köräş bezgä Peru xalqınıñ tınıçlığın, xozurın häm ışanıçın qaytarırğa mömkinlek biräçäk,” — dip belderde däwlät başlığı televideniye aşa möräcäğätendä.

Cinayätçelekneñ artuına qarşı protestlar

Uzğan atnada çıqqan köçle protestlarda ber keşe ülde, 100dän artıq keşe yaralanğan ide.

Yäş protestçılar xökümättän cinayätçelekneñ artuına qarşı köçleräk çaralar kürüne taläp itte.

Bu ay başında êlekke ilbaşı Dina Boluarte wazıyfadan alınğannan soñ urınına kilgän Xeri uzğan atnada yaña kabinetın täqdim itte häm iminlek mäsäläsen töp östenlek itep quyaçağına süz birde.

Peruda soñğı yıllarda iminlek mäsälälären xäl itü öçen berniçä tapqır ğadättän tış xäl iğlan itelde läkin belgeçlär bu çaralarnıñ näticäle bulmawın äytä. Êlekke ilbaşı Boluarte mart ayında şundıy uq 30 könlek ğadättän tış xäl kertkän ide ämma tänqitçelär bu çaranıñ cinayätçelekne kimetä almawın belderde.

Xeri soñğı qararnamäneñ qaysı cinayätlärgä qarşı yünältelgän buluı turında östämä mäğlümat birmäde fäqat üz xökümäteneñ tärtibne qabat urnaştıru häm watandaşlarnıñ ğömeren saqlaw öçen tırışaçağın äytte.