Ukraina İlbaşı Volodimir Zelenskiy Ukraina köçläreneñ Rusiyäneñ Qara diñgez portı Novorossiyskqa kerü öleşendäge sularda “külägä flotı”nıñ ike tankerına höcüm yasawın äytte.
Zelenskiy yäkşämbe könne “Telegram” aşa: "Bu tankerlar aktiv bularaq neft yörtü öçen qullanıla ide, inde qullanılmıylar. Ukrainanıñ ozaq radiuslı sälätläre diñgezdä, hawada häm cir östendä kiñ qolaçlı räweştä üsterelergä däwam iteläçäk”, - dip yazdı.
Cirle gubernator Aleksandr Drozdenko “Telegram” aşa citkergän yazmasında Ukrainanıñ keşesez hawa apparatlarınıñ Rusiyäneñ Baltiq (Baltıyk) diñgeze portı Primorskqa da höcüm itüen häm yanğınğa säbäp buluın belderde.
Drozdenko, Rusiyäneñ tönyaq-könbatışındağı Leningrad ölkäse östendä töne buyı 60tan kübräk dronnıñ bärep töşerelüen äytep, zur neft êksport noqtası bulğan Primorskqa höcümnän soñ neftneñ ağıp töşmäwen häm yanğınnıñ sünderelüen iskärtep uzdı.
Şul arada Rusiyäneñ dron höcümnäre Ukraina külämendä öç keşeneñ ülemenä kitergän bulsa, Ukrainanıñ höcümnäre Mäskäw tirä-yağında ber keşeneñ ülemenä säbäp bulğan.
Ölkä gubernatorı Oleg Kiper sośial mediadağı yazmasında möhim êksport terminalläre urnaşqan könyaqtağı Odessa töbägenä Rusiyä oyıştırğan höcümnärneñ ike keşeneñ ülemenä säbäp bulsa, ülüçelär arasında porttağı yök maşinası yörtüçeseneñ dä buluın äytte.
"Doşman dronnarı öç toraq binasına turı kilde häm tağın ike bina zarar kürde. Port asqormasına bäyle qorılmalar belän cihazlarğa da zıyan kiterelde”, - dip östäde ul.
Aşığıç yärdäm xezmätläre höcümnärdän soñ yanğın sünderüçelärneñ yanğınnı sündergän çaqta töşerelgän fotosürätlär belän urtaqlaştı.
Räsmilär könyaq Ukrainadağı Xerson front töbägenä qarşı Rusiyä höcümnäre näticäsendä dä ber keşeneñ häläq buluın belderde.
Ukraina hawa köçläre Rusiyäneñ tönge höcümdä 268 dron häm ber ballistik raketa oçırtuın äytte.
Rusiyä saqlanu ministrlığı beldergänçä, Ukraina armiyası isä kim digändä 334 dronnı Rusiyägä oçırttı.
Tönyaq-könbatıştağı Leningrad ölkäse aktiv räweştä nişan itep alınğan.
Kiev süzlärençä, soñğı atnalarda andağı neft êksportı terminallarına berniçä tapqır höcüm yasalğan häm milliardlağan dollarlıq êksportnı özgän.
