30 yıl êlek sıynıftaşın üterüdä ğayeple dip tabılıp, ülem cäzasın kötkän Krista Payk çärşämbe könne Tennessi ştatında in'yektsiyä yärdämendä ütereläçäk. Bu tormışqa aşsa, Payk 200 yıldan artıq waqıt êçendä ştatta ülem cäzasına tartılğan berençe xatın-qız bulaçaq.
Payk balaçaqtağı travma häm çensi köçläwne säbäp itep, yarlıqanuın sorağan, läkin gubernator Bill Li bu üteneçne kire qaqqan. AQŞ Yuğarı mäxkämäse, şulay uq, soñğı minutta kiçekterü turındağı üteneçne kire qağa.
Xäzer 50 yäşendä bulğan Payk, ike dustı belän bergä, 1995 yılnıñ ğıynwarında 19 yäşlek sıynıftaşı Kollin Slemmernı Nokswillda hönäri belem birü üzäge yanındağı urmanlıqqa aldap alıp kitkän häm anı yörgän yegetenä qarata könçelek arqasında ütergän.
Payk häm anıñ yegete berençe däräcädäge üterüdä ğayeple dip tabıla. Payk ülem cäzasına xökem itelä, ä yegete - ğomerlek törmägä, küzätep torğan tağın ber yäşüsmer şartlı räweştä xökem itelä.
Üterüne başqarğan yäş qız "monda yuq inde"
Payknıñ advokatları anıñ köç qullanu, qarawçısız qalu häm çensi zolım, şul isäptän, ike tapqır köçlänü oçrağın da kertep, awır balaçaq kiçerüen terkägän. Alar, şulay uq, törrmädä aña quyılğan bipolyar bozılu häm PTSD (travmadan soñğı stress bozıluı) diagnozlarına iğtibar yünältep, "awır psixik awıru häm disfunktsiyägä yaqın däräcädäge travma kiçergän 8 yäşlek qıznıñ xäzer bulmawın” rasladı.
Läkin Slemmernıñ änise ülem cäzasın xuplap belderülär yasadı.
AQŞta 1976 yıldan birle ülem cäzasına tartılğan 1683 cinayätçeneñ nibarı 18e genä xatın-qızlar.
