Törkiyä tışqı êşlär ministrlığı uzğan şimbä könne AQŞ häm İzrailneñ İranğa qarşı berdäm höcümnäre belän başlanğan suğıştan täêsir kürgän Yaqın Könçığış illärendäge Törkiyä watandaşlarına diplomatik missiyälär aşa yärdäm kürsätelüen belderde.
Ministrlıq süzçese Öncü Käçäli “X” platformasındağı yazmasında töbäktäge höcümnärneñ maqsatı bulğan illärdäge Törkiyä watandaşların yaqlaw öçen kiräk bulğan çaralarnıñ kürülüen äytte. Ul Törkiyäneñ çit illärdäge diplomatik wäkillekläreneñ atnasına 7 kön, täwlegenä 24 säğat aşığıç yärdäm liniyäläre belän xezmät itüen assızıqladı. Süzçe watandaşlarnıñ üzläre bulğan illärdäge Törkiyä wäkillekläreneñ belderülären yaqınnan küzätep barırğa tiyeşlegän citkerde.
Käçäli Törkiyä watandaşlarınıñ Gıyraq, İran, İzrail, Livan, Soğud Ğaräbstanı, Süriyä, Oman häm Yordanıyädän törle transport yulları belän kitä aluın, bu illärdäge diplomatik missiyälärneñ imin säyäxät oyıştıru mäs'äläsendä yünäleş birüen citkerde.
Käçäli, Baxreyn, Katar häm Küveyttän Törkiyägä turıdan-turı hawa bäyläneşe bulmawın belderde häm Berläşkän Ğaräp Ämirleklärennän Törkiyägä oçışlarnıñ isä siräk häm nibari ayırım oçraqlarda ğına tormışqa aşırıluın äytte. Dürt ildän Törkiyä watandaşlarınıñ qorı yuldan Soğud Ğaräbstanı häm Omanğa küçerelüe öçen avtobus säfärläre oyıştıru buyınça êşlär däwam itä. Käçäli annan watandaşlarnıñ Törkiyägä oça alaçağın äytte. Läkin avtobus säfärlären başlap cibärüneñ cirle xäkimiyätneñ röxsätenä bäyle buluın da östäde.
Käçäli, töbäktäge şartlarnıñ tiz üzgärüen assızıqlap, Törkiyä watandaşların üzläre bulğan illärdäge diplomatik missiyälärneñ iğlannarın küzätergä çaqırdı.
