Süriyä ilbaşı Äxmät äş-Şara Dimaşqnıñ Rusiyä belän “tarixi häm strategik” mönäsäbätlärne yañartuğa äzer buluın belderde.
“Bez Rusiyä belän êlekke kileşülärne häm urtak tarixi mönäsäbätlärne xörmät itäbez häm bu mönäsäbätlärneñ tabiğaten yañadan bilgeläyäçäkbez,” – dip belderde äş-Şara çärşämbe könne Mäskäwdä Rusiyä ilbaşı Vladimir Putin belän urtak matbuğat oçraşuında.
“Bez Rusiyä belän yaqın mönäsäbätlärdä häm Süriyäneñ ênergiä sektorınıñ zur öleşe Rusiyä belgeçlärenä bäyle,” – dip östäde ul.
Putin, üz çiratında, äş-Şaranı Süriyädä bu ay başında ütkän parlament saylawları belän qotladı häm Mäskäwneñ Dimäşq belän mönäsäbätlärne nığıtırğa äzer buluın belderde.
Putin bu süzlärne Kremldäge oçraşu başında äytte.
Putin äş-Şaranı Kremldä qarşı alğanda, Süriyä belän yıllar buyı bulğan “üzençälekle” mönäsäbätlärne maqtadı.
“Beznen illär arasında küp yıllar buyı üzençälekle mönäsäbätlär barlıqqa kilde,” – dip äytte Putin äş-Şarağa televidenie aşa kürsätelgän çığışında.
Äsadnıñ tapşırıluı
Süriyä xökümäte wäkile “AFP” agentlığına äş-Şaranıñ, bärep töşerelgännän soñ Rusiyägä qaçqan Bäşär äl-Äsadnı tapşıru turında sorarğa cıyınuın belderde. Mäskäw häm Dimäşq ike lidernıñ Süriyädäge Rusiyä xärbi bazaları yazmışın da qarayaçağın äytte.
Äsad bärep töşerelgännän soñ ber köngä Kreml aña häm ğailäsenä Rusiyädä sıyınu birelüen iğlan itte.
Kreml, şulay uq, ike lidernıñ Mäskäwdäge oçraşuda Süriyädäge Rusiyä xärbi bazaları tiräsendäge wäzğıyätne söyläşäçägen belderde.
“Bu mäsälä niçek bulsa da söyläşüdä qaralırğa tiyeş, bu kötelgän xäl,” – dip belderde Kreml süzçese Dmitriy Peskov matbuğat brifingında.
Mäskäwneñ Süriyädä ike xärbi qorılması bar: Tartus şähärendä diñgez bazası häm Xmeymim hawa bazası, ikese dä Urta diñgez yar buyında urnaşqan.
