Ukraina wäkillege 17–18 fevral’ könnärendä AQŞ aradaşçılığında ütkärelergä tiyeşle Rusiya belän yaña tur tınıçlıq söyläşüläre öçen Jenevağa kitte.
Bu xaqta Ukraina ilbaşı idaräse ofisı başlığı Kirilo Budanov belderde.
Budanov düşämbe könne “Telegram” aşa üze häm wäkillektäge ike äğ’za belän poyezd vagonı aldında töşkän fotosın urtaqlaştı häm bolay dip yazdı: “Bez Jenevağa barabız. Bezne söyläşülärneñ kiläse êtabı kötä. Yulda bez xezmättäşlärebez belän tarixıbızdan alğan sabaqlarnı tikşerep, döres näticälärgä ireşergä tırışaçaqbız. Ukraina mänfäğat’läre saqlanırğa tiyeş.”
Bıyıl Rusiya, Ukraina häm AQŞ qatnaşında ütkärelgän berençe öç’yaqlı iminlek kiñäşmäläre 23–24 ğıynvarda Berläşkän Ğaräp Ämirlekläre başqalası Abu-Dabida uzğan ide.
Bu söyläşülärdä Mäskäw delegaśiyäsen Rusiya Federaśiyäse Qorallı Köçläre ğomum ştabınıñ töp küzläw idaräse başlığı İgor’ Kostyukov citäkläde.
İkençe tur isä 4–5 fevral’ könnärendä şul uq urında ütkärelde.
Kreml’ süzçese Dmitriy Peskov uzğan atnada yasağan belderüendä Ukraina krizisın çişü barışına qağılışlı söyläşülärneñ kiläse êtabınıñ Rusiya–AQŞ–Ukraina öç’yaqlı formatında uzaçağın häm söyläşülärneñ 17–18 fevral’dä Jenevada bulaçağın beldergän ide.
