AQŞ ilbaşı Donal'd Tramp Törkiyä ilbaşı Räcäp Täyyip Ärdoğannı Ğazzä Tınıçlıq şurasına nigez saluçı räis bularaq quşılırğa çaqırdı.
Törkiyä ilbaşı idaräseneñ êlemtä bülege başlığı Burhanettin Duran Törkiyäneñ “NSosyal” media platformasında bolay dip citkerde:
“2026 yılnıñ 16 gıynwarında Tramp Tınıçlıq şurasınıñ nigez saluçı başlığı bularaq xat cibärep, ilbaşıbız Räcäp Täyyip Ärdoğannı Ğazzä Tınıçlıq şurasına nigez saluçı räis bularaq quşılırğa çaqırdı”.
Duran Berläşkän Millätlär Oyışması İminlek şurasınıñ 2803 nomerlı qararı nigezendä AQŞ ilbaşı Donal'd Tramp tarafınnan iğ’lan itelgän Ğazzä konfliktın beterü öçen kiñqırlı plannı xuplarğa qarar qıluın häm bu qısalarda Ğazzädä iminlek täêmin itüdän häm suğıştan soñğı torğızudan cawaplı bulaçaq Tınıçlıq şurası häm anıñ organnarı buldırıluın citkerde.
Aq Yort şulay uq Tınıçlıq şurası qısalarında idarä häm xezmät kürsätüne täêmin itäçäk Başqarma şura tözelüen dä belderde.
Anıñ äğ’zaları arasında Törkiyä tışqı êşlär ministrı Xakan Fidan, Trampnıñ maxsus wäkile Stiv Uitkoff, Trampnıñ kiyäwe Djared Kuşner, Angliyäneñ êlekkege prem’yer-ministrı Toni Blêr, Berläşkän Ğaräp Ämirlekläreneñ Xalıqara xezmättäşlek däwlät ministrı Reem Äl-Haşimi, Qatarnıñ täcribäle diplomatı Ali Äl-Täwadi, Mısır küzläw xezmäte citäkçese Xasan Raşad, BMOnıñ êlekkege wäkile Nikolay Mladenov, Kipr-İzrail êşmäkäre Yakir Gabay häm Niderland säyäsätçese Sigrid Kaag bar.
