Gäräp illäre İzrailneñ Ğazzädä alıp barğan häm kençe yılına yaqınlaşuçı "genotsid suğışı"n tiz arada tuqtatırğa çaqırdı.
Küwäyt täxet warisı Şäyex Sabah Xalid äl-Xamad äl-Sabah Berläşkän Millätlär Oyışması İminlek Şurasınıñ Yaqın Könçığışqa bağışlanğan açıq utırışında, Farsı qultığı xezmättäşlege şurası isemennän belderü yasadı.
Sabah bu utırışnıñ Ğazzädäge facıyğäneñ iñ qara çorlarınıñ bersendä uzuın äytep, cimerelü, blokada häm kübese xatın-qızlar häm balalar bulğan 64,000nän artıq tınıç xalıqnıñ ülemgä duçar buluına iğtibarnı cälep itte.
Ğazzädäge wäzğıyätne "genotsid häm êtnik çistartu ürnäge, kürmämeşkä salışıp bulmastay tirän yara" dip atap, ul şuranı höcümnärne tuqtatu, gumanitar yärdämneñ ireşüen täêmin itü häm tınıç xalıqnı yaqlaw öçen konkret çaralar kürergä çaqırdı.
Misırnıñ Berläşkän Millätlär Oyışmasındağı daimi wäkile Osama Äbdelxäliq Qahiräneñ, İzrail provokatsiyälärenä qaramastan, kiyerenkelekkä yul quymawın äytte häm ut açunı tuqtatu zarurlığın basım yasap belderde.
Ul İzrailneñ "suğışnı däwam itü turındağı tırışlıqların" tänqıytläp, Ğazzädäge gumanitar facıyğäneñ tiz arada tämamlanırğa tiyeşlegen äytte.
Fälästin wäkile Riyad Mansur: "Fälästin xalqı keşelek däräcäsennän tübän can iyäläre tügel. Bez tormışqa, irekkä häm xörmätkä layıq. İzrailneñ Ğazzädä bezneñ xalqıbızğa qarata qılğan cinayätläre bernindi şartlarda da aqlana almıy," – dip belderde.
Mansur östäp: "Genotsid yuq, urlaw yuq, köçläp küçerü yuq, kolonizatsiya yuq, anneksiya yuq, okkupatsiya yuq – barı Ğazzäne qotqarığız. Fälästinne qotqarığız. Tınıçlıqnı qotqarığız," – dip äytte.
Ğaräp Berlege ğomum särqatibe Äxmät Äbü Gäyt şurağa möräcäğat itep bolay dide: "Ğazzädä bulğannar – wäxşäte häm qırğıylığı yağınnan moñarçı kürelmägän xällär. Läkin maqsatları açıq: Fälästin cämğıyäten yuq itü häm böten töbäkne yäşäw öçen yaraqsız xälgä kiterü, xalqını qaçıp kitärgä mäcbür qılu”.
"Ğazzädä bulğannar Ğazzädä genä qalmayaçaq," – dip ul tiz häm konkret çaralar kürergä çaqırdı.
"Şuranıñ döres qarar qabul itär waqıtı citte. Suğışnı, irtägä tügel, bügen tämamlıyq häm Ğazzäne yañadan torğızıp, balalarğa balaçaqların qaytarıyq," – dip östäde Äbü Gäyt.
