İzrail köçläre suğışta cimerelgän Gazzägä qarata diñgez blokadasın beterergä tırışqan xalıqara flotnıñ soñğı köymäsen dä qanunsız räweştä tuqtatqannan soñ, dön’ya külämendä  İzrailneñ Gazzädäge ğamällärenä häm köymälärdäge yaqınça 450 aktivistnıñ saq astına alınuına rizasızlıq belderülär arttı.

Oyıştıruçılar beldergänçä, flotnıñ soñğı köymäse “Marinette” comğa könne cirle waqıt belän 10 säğat’ 29 minutta  (07:29 GMT) xalıqara sularda, Gazzägä yaqınça 42,5 diñgez mile yıraqlığında höcümgä duçar bulğan.

Global’ Sumud flotı X platformasında yasagan belderüendä:

“İzrail ğäskärläre global’ Sumud flotınıñ Marinette köymäsenä menep aktivistlarnı äsir itep aldı” dip yazdı häm
“Turıdan -turı translyaśiya ber ğäskäri kameranı watu arqasında özelde” dip östäde.

İnternetta taralğan videoyazmada, çiktän tış uñçı İzrail ministrınıñ qulğa alınğan aktivistlarnı mısqıllap, alarnıñ yärdäm tırışlıqlarınnan kölüe, aktivistlarnı terrorçılıqnı yaqlawda ğayepläwe kürenä.

Oyıştıruçılar yasagan matbuğat belderüendä, saq astına alınğan keşelärneñ Gazzägä yaqınça 30 kilometr yıraqlıqta, Mısır çigendäge Negev çülendä urnaşqan Ketziot törmäsenä küçerelüe äytelde.

Belderügä qarağanda, aktivistlarnıñ xäle yaxşı; qayberläre isä açlıq iğ’lan itkän.

Şulay uq berniçä aktivist qına “Aşığıç çığu taläpläre”nä qul quyğan, bu alarnı deportaśiyäläwne  tizlätä ala, imzalamağan keşelär isä İzrail qanunnarına kürä 72 säğat’kä qadär saq astında totıla ala.

Flot köymälärenä qarata yasalğan höcümnär häm aktivistlarnıñ qulğa alınuı Latin Amerikasınnan Aziyägä qadär protestlarğa säbäp buldı.

Awrupada pänceşämbe kiçendä Madrid häm Barselona başta bulu belän bergä un meñlägän keşe uramnarğa çıqtı.

Rim, Parij häm Jenevada da protest çaraları ütkärelde.

İtaliyäneñ iñ zur hönärçelär berlege comğa könne ber könlek ğomumi êş taşlaw çarasına çaqırdı.