Poliśiya Avstraliyädä soñğı yıllardağı iñ ütergeç kümäk höcüm bularaq terkälgän Bondi waqıyğalarınnan cawaplı buluı däğ’wa itelgän qorallı höcümçe Navid Akramnı terrorçılıq, 15 keşene üterü häm başqa berniçä cinayät’tä ğayepläde.

Yaña Kön’yaq Vels ştatı poliśiyäse çärşämbe könne yasağan belderüendä bolay dide: «Poliśiya bu keşeneñ mäxkämädä dini maqsatlarda ülemgä, citdi cäräxätlärgä kiterä torğan häm ğomergä qurqınıç tudıra torğan ğamällär qılıp, cämğıyät’tä qurqu tudırırğa tırışuın däğ’wa itäçäk. Berençe näticälär  Avustraliyädä terror oyışmaları isemlegendä torğan “DEAŞ” täêsire astında êşlängän terror höcümenä işarä itä».

Räsmilär äytüençä, Navid häm anıñ ätise Sacid Akram yäkşämbe kiçendä Sidneynıñ mäşhür  Bondi plyajında uzğan yähüd festivalendä  ut açqannar, näticädä 15 keşe hälaq bulğan, distälägän keşe yaralanğan.

Höcüm waqıtında Navid poliśiya tarafınnan awır yaralana, cirle media sişämbe kiçendä anıñ komadan uyanuın xäbär itte. Sacid Akram isä poliśiya belän bäreleştä üterelä.

Poliśiya mäğ’lümatına qarağanda, Navid xaqında şulay uq üterü niyäte belän awır tän cäräxätläre yasawdan 40 ayırım ğäyepläw bar häm ul tıyılğan terror oyışmasınıñ simvolın cämäğat’çelek aldında kürsätüdä dä ğäyeplänä.

Navid isemenä terkälgän häm plyaj yanındağı maşinada quldan yasalğan ike “DEAŞ” bayrağı tabılğan.

Poliśiya beldergänçä, Navid xäzer xastaxanädä totıla häm çärşämbe könne videoêlemtä aşa mäxkämägä çığarılaçaq.