Münxen İminlek Konferentsiyäse başlandı. Oyıştıruçılar "qarşılıqlı krizislar, üsüçe geosäyäsi kiyerenkelek häm tirän sistemalı üzgäreşlär" nisbätennän "ğadättän tış aşığıç" dip atağan çarada 115tän artıq ildän 1000nän kübräk qatnaşuçı bergä cıyıla.
Germaniya kantślerı Fridrix Merts yasağan açılış çığışınnan soñ comğa könne küp sanda spikerlar säxnägä çığaçaq.
Fiker alışular xalıqara tärtipneñ häm transatlantik berleklärneñ kiläçäge, Awrupanıñ saqlanu häm iminlek sistemasın köçäytü tırışlıqları, Ukrainanı yaqlaw, Gazzäne yañadan tözü häm İrannı üz êçenä alğan kiyerenkeleklär belän bergä, klimat häm ênergiyä iminlege, atom-töş yanawları, yasalma aqıl häm säwdä belän texnologiyäneñ qoral itep qullanıluı mäs'älälärenä yünälteläçäk.
Ukraina däwlät başlığı Volodimir Zelenskiy dä kergän 60qa yaqın däwlät häm xökümät başlığınıñ qatnaşuı kötelä.
Awrupa liderlarınıñ öçtän ikesennän artığı qatnaşuın rasladı. AQŞ isä "bügengä qadärge iñ zur delegatsiyäse" belän kilä. Bu delegatsiyägä AQŞ Senatınıñ dürttän berennän artığı kerä häm anı däwlät särqatibe Marko Rubio citäkli.
Şulay uq, çarada Awrupa Berlege, NATO, Könyäq-Könçığış Aziyä illäre berlege (ASEAN), Awrupada iminlek häm xezmättäşlek oyışması (YeXU/AGİT), Dönya bankı, Bötendönya säwdä oyışması häm küp sandağı BMO agentlıqların da kertep, 50dän artıq xalıqara oyışma başlığı qatnaşa.
Oçraşu aldınnan bastırılğan yıllıq Münxen İminlek xisabı "dönyanıñ cimerü säyäsäte xökem sörgän däwergä kerüe" häm "AQŞ citäkçelegendäge suğıştan soñğı xalıqara tärtipneñ xäzer cimerelü aldında toruı" turında iskärtä.
Xisap AQŞ ilbaşı Donald Trampnıñ "buldozer" säyäsäten tänqıytläp, monıñ xalıqara tärtipne yuqqa çığaruın häm "baylar, köçlelär häm regional' gegemonnar" tarafınnan formalaştırılaçaq dönyaga yul açuın belderde.
Vaşingtonnıñ xalıqara xoquqnı iğtibarsız qaldıruı häm bulğan qağıydälärne häm oyışmalarnı tarqatuğa yünältelgän tırışlıqlarınıñ dönya külämendäge krizislar häm bäreleşlär öçen tirän näticäläre bulaçağı alğa sörelde.
