Bıyıl 12-16 may könnärendä Venada ütkäreläçäk 70nçe Yevrovideniye cır bäygese öçen äzerleklär bara. İzrailneñ qatnaşuına yünälgän protest häm boykot çaqıruları könnän-kön arta bara.
Soñğı atnalarda reakśiälär uram çaraları belän çiklänmiçä, mädäniät, media häm säyäsät mäydanına da çağıldı.
Şaqtıy il cır konkursın kürsätmäyäçäk
Konkursta turıdan finalğa uzu xoquqına iyä bulğan illärneñ berse häm İzrailneñ qatnaşuı säbäple bäygene boykot itü qararına kilgän İspaniyäneñ däwlät teleradiokompaniyase “RTVE” 1961 yıldan birle özleksez kürsätkän çaranı bıyıl turıdan-turı kürsätmäyäçäk.
İrlandiya da cır bäygesen boykot itkän häm anı kürsätüdän baş tartqan illär arasında.
Yevrovideniyene boykot itüçe illär arasında bulğan Sloveniyäneñ teleradiokompaniyase “RTV SLO” bäyge könnärendä "Fälästin tawışları" tematikasında tapşırunı êfirğa biräçägen belderde.
“RTV SLO” Fälästingä bağışlanğan fil'mlar, dokumental' fil'mlar häm analiz programmaların kürsätäçägen açıqladı.
Cır bäygesendä qatnaşuçı illärdä dä reakśiyalär arta
Portugaliyadä milli saylap aluda qatnaşqan 16 artist, ägär alar saylansa, Yevrovideniyedä qatnaşudan baş tartaçaqların belderde. Artistlar Ğazzädä fälästinlelärgä qarşı genośid başqaruçı İzrailneñ Yevrovideniye cır bäygesennän tıyıluın taläp itte.
Greśiyadä töp oppoziśiya partiyase “SYRIZA” da xökümätne İzrailneñ qatnaşuı arqasında konkurstan çığarğa çaqırdı, anıñ “Ğazzädä genośid başqaruçı Netanyaxu rejimı belän strategik partnyerlığın” tänqıytläde.
Maltada isä 150dän artıq sänğatçe häm intelligenśiya İzrail tıyılmasa, ilneñ konkurstan çığuın taläp itte. Häm başqala Vallettada “Genośid öçen muzıka yuq” şiğare astında protest çarası oyıştırıldı.
İtaliya däwlät televideniyese “RAI”neñ idari şurasınıñ qayber äğzaläre Awrupa media berlegen bıyılğı konkurska Fälästin temasın kertergä çaqırdılar.
