Törkiyä ilbaşı Räcäp Tayyip Ärdoğan çärşämbe könne Änkarada parlamenttağı törkem cıyılışında yasağan çığışında Törkiyä iqtisadınıñ öçençe kvartalda yıllıq bazada 3,7%qa üsep totrıqlı tendenśiyäsen saqlap qaluın, 21 kvartal rättän özleksez üsüen häm bu kürsätkeç belän Törkiyäneñ OECD iqtisadları arasında dürtençe urınnı aluın belderde.

Ärdoğan şulay uq turizm keremnäreneñ berençe tuğız ayda 50 milliard dollar belän rekord quyuın, ilgä kilüçelär sanınıñ uzğan yıl belän çağıştırğanda 1,6%qa artuın citkerde.

İlbaşı şulay uq Törkiyäneñ kredit risk premiyäseneñ soñğı 7 yıl êçendä iñ tübän däräcagä töşüenä basım yasadı.

Ärdoğan noyabr’ ayındağı inflyaśiyäneñ 0,87% buluı häm töp tovarlar inflyaśiyäseneñ 18%qa qadar kisken töşüeneñ xökümätneñ inflyaśiya kimetü programmasına ömetlärne arttıruın belderde.  

Afrika belän säwdä mönäsäbätläre üsä

Tışqı mönäsäbätlärgä dä tuqtalğan ilbaşı Ärdoğan Törkiyäneñ Afrika belän säwdä külämeneñ 20 yıl êçendä 5 milliard dollardan 37 milliard dollarğa qadär artuın, maqsatnıñ 50 milliard dollar buluın äytte.

Ul Törkiyä şirkätläreneñ Afrika qıytğasına 10 milliard dollar külämendä investiśiya saluın häm 97 milliard dollarlıq 2000 nän artıq proyektnı tämamlawın bilgeläp ütte.

41 ildä 64 punktqa citkän “Törek hawa yulları” aviakompaniyäse Afrika qıytğasındağı iñ kiñ oçış çeltärenä iyä şirkätlärneñ berse dip sanala.

İlbaşı Ärdoğan 2026 nçı yılnı diplomatiyädä borılış noqtası dip iğ’lan itte häm Törkiyäneñ COP 31, NATO häm Törki däwlätlär oyışması sammitların qabul itäçägen äytte.

Ärdoğan şulay uq saqlanu ölkäsendäge alğarışlarnı da assızıqladı.

Törkiyä ilbaşı 29 nçı noyabr’dä “Kızılelma” pilotsız höcüm oçqıçın sınawnıñ vizual’ diapazonnan çittä hawadağı maqsatqa tiderä alırlıq berençe qorallı poliotsız oçu apparatı buluın häm monıñ Törkiyägä hawa saqlanu sistemasında strategik östenlek birüen citkerde.