Vinton okrugı şerifı Rayan Keyn matbugat konferentsiyäsendä ber gailädän bulğan häm 1,5 yäştän 18 yäşkä qadärge 16 balanıñ keşe näcesläre belän tulı antisanitar moxittä yäşäwen belderde.

Kayber balalarnıñ söyläşä almawı, ä üseşendä prolema bulğan 18 yäşlek yegetneñ, xätta, üz isemen dä icekläp äytä almawı citkerelde.

Şerif Keyn yorttağı şartlarnı "cirängeç küreneş" dip atadı, xätta terleklär dä bu balalarğa qarağanda yaxşıraq şartlarda totıla dip östäde.

Bu waqıyğadan soñ, balalarnıñ änise, ätise häm ike äbi-babası qulğa alınğan. Vinton okrugı prokurorı Uilyam Arçer xäbär itüençä, şöbhälelärneñ härbersenä qarata 16 ayırım ğayepläw belderelgän, härberse "balağa citdi fiziki zıyan kiterü häm qurqınıç astına quyu"da ğayeplänä. Prokuror Arçer bu waqıyğanıñ keşe urlaw oçrağı tügel, ä "ğailä êçendäge xäl" buluın assızıqladı.

Oçraqlı räweştä tabıldılar

Ogayo ştatınıñ baş prokurorı êndi Uilson balalarnıñ başqa tikşerü qısalarında ütkärelgän tentü waqıtında oçraqlı räweştä tabıluın citkerde.

Qotqarılğan balalarnıñ cidese Kolumbustagı xastaxanälärgä ozatılğan, ä ikese aşığıç yärdäm üzäklärenä boralaq belän ciberelgän. Baş prokuror Uilson awır xäldäge ber balağa intubatsiya yasalğanın belderde.

Alar yäşerenep yäşägän

Tikşerüçelär ğailäneñ soñğı yegerme yıl däwamında Ogayo buylap daimi küçenep yörüen, şunıñ belän räsmi meditsina häm ştat yazmalarınnan qaçıp qotıluın açıqladı. Ğailädän başqa berkem dä balalarnıñ barlığı turında belmägän, alarnı xätta mäktäpkä dä cibärmägännär. Şöbhälelär balalarnı yäşerüdä professionallärçä êş itkän dip bilgeläp ütelde.

Meñ keşedän kimräk xalqı bulğan Xamden awılında yäşäwçelär, älege öydä balalar buluın bilgäç, bik ğacäplängän.

Kürşeläre ğailä küçenep kilgännän birle yort tiräsendä balalar kürmäwlären häm bu tiräneñ bik tınıç buluın äytä.

Prokuratura barlıq balalarnı waqıtlıça däwlät qaramağına küçerü öçen xoquqıy êşçänlek başladı.