Operativ yärdäm köçläre Sudan başqalası Xartumdağı möhim punktlarğa  pilotsız oçu apparatları belän höcümnär oyıştırğan. Cirle mäğ’lümat çaraları xäbär itüençä, nişan itep alınğan urınnar arasında Xartum Xalıqara aêroportı häm ber êlektr konverter stanśiyäse dä bar.

Sişämbe könne “Rakoba News” qa interv’yu birgän waqıyğa şahitları beldergänçä, aêroport tiräsendä kimendä 8 şartlaw işetelgän. Sudan Grajdan aviaśiya avtoritetı yaqınça 30 ay êlek başlanğan bäreleşlärdän soñ berençe tapqır aêroportnı çärşämbe köne êçke reyslar öçen açarğa uylıy ide.

Xäbärgä qarağanda, bu höcüm ozaq waqıttan birle kiçekterelep kilgän açılışqa qomaçawlaw öçen bulırğa mömkin.

Sudan ğäskärläre qayber pilotsız oçqıçlarnı bärep töşergän, läkin qalğannarı maqsatlarına ireşkän häm törle däräcädä zıyan kitergän, şulay uq tirä yaqtağı mäxällälärdä panikağa säbäp bulğan.

Sudan armiyäse häm Operativ yärdäm köçläre bu xäbärlär xaqında belderü yasamadı.  

Sudan armiyäse mart ayında yasağan belderüendä 2023 yılnıñ aprelendä ike yaq arasında başlanğan bäreleşlärdän birle berençe tapqır Xartum aêroportı häm anıñ tiräsendäge qayber töbäklärdä kontrol’ne yañadan üz qulına aluın citkergän ide.

Birläşkän Millätlär Oyışması beldergänçä, ildä däwam itüçe bäreleşlär näticäsendä 20 meñnän artıq keşe hälaq bulğan, 14 millionnan artıq keşe yäşägän cirlärennän küçep kitkän häm bu xäl dön’yadağı iñ awır keşelek krizislarınnan berse bularaq bäyälänä.