İran matbuğatı beldergänçä, Oman tışqı êşlär ministrı, Tähran häm Vaşington arasındağı kiyerenkelekne kimetü öçen däwam itüçe turıdan-turı bulmağan söyläşülärneñ ber öleşe bularaq, İran häm AQŞ räsmi zatları belän ayırım-ayırım ikençe tur söyläşülären ütkärde.

İran däwlät xäbär agentlığı IRNA comğa könne xäbär itkänçä, tışqı êşlär ministrı Abbas Araqçi ikençe tur söyläşülärendä üz ileneñ qaraşların Omanlı xezmättäşe Bädr äl-Busaidigä täqdim itte.

IRNA êlegräk Araqçineñ äl-Busaidi belän ütkärelgän berençe tur söyläşülärdä İrannıñ planın Oman yağına citkerüen, bu plannıñ isä AQŞnıñ Yaqın Könçığış buyınça maxsus wäkile Stiv Uitkoff belän urtaqlaşılıwın beldergän ide.

Belderüdä: “İkençä tur söyläşülärendä Amerika delegatsiyäseneñ cawabı İran yağına citkereläçäk”, - dip äytelde. Şulay uq, AQŞ delegatsiyäseneñ berençe turda da omanlı aradaşçılar belän üz fikerlären urtaqlaşuı östälde.

Comğa könge söyläşülärdä İrannı Araqçi citäkçelegendäge delegatsiyä wäkillek itte.

AQŞ räsmi zatları belderüençä, söyläşülärdä AQŞnı Stiv Uitkoff häm AQŞ ilbaşı Donald Trampnıñ kiyäwe häm yärdämçese Jared Kuşner wäkillek itä.

Soñğı könnärdä küp kenä illär, şul isäptän, Törkiyä dä Tähran häm Vaşington arasındağı kiyerenkelekne kimetü öçen aradaşçılıq täqdimnären citkerde.