Rusiä tön buyı Ukrainağa oyıştırğan zur höcümendä dürt keşe hälaq buldı, 30dan artıq keşe yaralandı. Mäskäw citäkçelege Ukrainanıñ könyaq-könçığışındağı Dnepr şähären häm başqa töbäklären maqsat itep alğan höcümdä 660tan artıq keşesez oçu apparatı häm raketalar qullandı.
Ukraina ilbaşı Volodimir Zelenskiy sośial' çeltärdä yasağan açıqlawında: “Ruslar tön buyı diyärlek Dneprnı häm başqa şähärlärebez belän toraq punktlarıbıznı bombaladılar”, — dide häm maqsatlarnıñ kübeseneñ şähär infrastrukturası buluın belderde.
Töbäk gubernatorı Aleksandr Ganja Dneprda Rusiä höcüme oyıştırılğan ber binadan ike keşeneñ mäyeten çığarunı, tağın biş keşeneñ xäräbälär astında qalğan buluı mömkinlegen äytte. Ganja şähärdä 21 keşeneñ yaralanuın açıqladı.
Tönyaqtağı Çernigov töbägendä isä gubernator äytüençä raketa häm dron höcümnärendä ike keşe hälaq buldı, cide keşe yaralandı.
Zelenskiy: “Mondıy här höcüm partnyerlarıbızğa wazğıyätneñ aşığıç häm täwäkkäl adımnar yasawıbıznı, hawa saqlanuıbıznı tiz arada köçäytü zarurlığın xäterlätergä tiyeş”, — dide.
Ukraina Hawa köçläre “Telegram” kanalında yasağan açıqlawında, Rusiäneñ Ukrainağa 619 dron häm 47 raketa belän höcüm itüen, şularnıñ 580 dron häm 30 raketasınıñ bärep töşerelüen belderde.
Rusiä Ukrainağa här tön distälärçä dron belän höcümnär yasıy, qaywaqıt yözlärçä dron häm distälärçä raketa qullanılğan kiñ qolaçlı höcümnär dä oyıştıra.
