Törkiyä ilbaşı Räcäp Tayyip Ärdoğan düşämbe könne AQŞ ilbaşı Donald Tramp belän telefonnan söyläşü ütkärep, Ğazzädä häm Ukraina-Rusiyä arasında tınıçlıq urnaştıru tırışlıqların quzğataçağın äytte.
Ärdoğan yaña yılnıñ berençe könendä İstanbulda oyıştırılğan zur Fälästingä teläktäşlek mitingın tarixi mizgel dip atap, monıñ Fälästinneñ yalğız tügellege yullaması buluın belderde.
İlbaşı comğa könne belderü yasap: “Netanyaxu isemle firğawen barısı öçen dä cawap biräçäk. Çönki şaqtıy keşegä qayğı-xäsrät kürsätte. Ul sabıylar öçen cawap biräçäk,” – dide.
Ğazzädäge gumanitar wazğıyätneñ naçar buluına tuqtalğan Törkiyä ilbaşı Räcäp Tayyip Ärdoğan tübändägeçä däwam itte: “Zäñgär êkrannarda su basqan çatırlarda, cil-dawıl, yañğırlar astında yäşäwçe balalarnıñ xälen küräbez. Alarnıñ bu xäle öçen Netanyaxu cawap biräçäk.”
Ärdoğan comğa namazınnan soñ belderü yasap, AQŞ ilbaşı Tramp belän düşämbe könne telefonnan söyläşäçägen açıqladı.
“Düşämbe könne 16:00 tiräsendä Xörmätle Tramp belän telefonnan söyläşü bulaçaq. Rusiyä-Ukraina arasındağı mäs’älälärne, şulay uq Fälästindäge mäs’älälärne dä quzğataçaqbız,” – dide ul.
"Fälästinne onıtmayaçaqbız”
Keşelek ittifaqı häm milli irada platforması tüşäme astında oyıştırılğan Fälästingä teläktäşlek mitingında qatnaşır öçen pänceşämbe könne irtänge sägätlärdä İstanbuldağı Galata küperendä yaqınça 520 meñ keşe cıyıldı.
400dän artıq ictimağıy oyışma qatnaşında häm “Törek yäşläre” waqıfı citäkçelegendä oyıştırılğan çara “Qurıqmıybız, tınmıybız, Fälästinne onıtmayaçaqbız!” şiğare belän uzdı.
Xalıq Ğazzädäge genośidnı beterergä çaqırdı.
İzrail 2023 yılnıñ oktäbrendä başlanğan suğışta 71 meñnän artıq fälästinlene üterde.
Ağımdağı yılnıñ oktäbrendä utnı tuqtatu kileşüe ğamälgä kerde läkin İzrail höcümnären tuqtatmadı.
