AQŞ ilbaşı Donald Tramp NATOdağı berlektäşläre belän Kremlneñ Ukrainağa qarşı suğışın tuqtatu öçen Rusiyägä basımnı arttıruın belderde.

Pänceşämbe könne Finlyandiya ilbaşın Oval ofista qabul itkän Tramp jurnalistlarğa bolay dide: "Bez basımnı arttırabız. Monı bergä êşlibez. Barıbız da arttırabız. NATO iskitkeç êş başqara. NATOğa küp qoral sata başladıq häm alar, minemçä, kübräk Ukrainaga kitä. Bu alarnıñ qararına bäyle, läkin alar AQŞtan qoral ala. Dönyanıñ iñ yaxşı qoralın bez citeşteräbez."

Tramp AQŞ belän Finlyandiya arasındağı xezmättäşlekne maqtap, 11 bozwatqıç qorab citeşterügä qarağan kileşü turında söyläde, şularnıñ cidesen AQŞta töziyäçäklär.

Stubb bu kileşüne ike il arasındağı mönäsäbätlärne nığıta dip bäyäläde häm berençe qorabnıñ 2028 yılda tapşırılaçağın belderde.

Ul, Trampnıñ Ğazzädä utnı tuqtatu kileşüennän soñ Ukraina mäs’äläsendä dä kileşü tözi alaçağına ışanuın äytep, jurnalistlarğa bolay dip citkerde: “Monıñ ikençe kileşü bulaçağına ışanam.”