AQŞ ilbaşı Donald Tramp Törkiyä däwlät başlığı Räcäp Tayyip Ärdoğannıñ Rusiyä belän Ukraina arasındağı suğışnı tuqtatu öçen möhim rol uynıy aluın belderde.
Düşämbe könne Tramp häm Mısır däwlät başlığı Äbdelfättah äl-Sisi Şarm äl-Şäyex şähärendä Ğazzädä utnı tuqtatu kileşüen imzalaw öçen 20dän artıq dönyaküläm lidernı cıyğan sammit ütkärde. Anda Törkiy ilbaşı da qatnaştı.
Tramp “Air Force One” oçqıçında Misırdan Aq Yortqa qaytqanda jurnalistlar belän söyläşte. Ul, Rusiyä belän Ukraina arasındağı suğışta liderlar, bigräk tä Ärdoğan, yärdäm itä ala mikän digän sorawğa: “Ärdoğan buldıra ala,” –dip cawap birde.
“Anı Rusiyä xörmät itä,” – dip östäde Tramp.
Törkiyä 2022 yılnıñ fevralendä başlanğan Rusiyä-Ukraina suğışın tuqtatu öçen tırışuların däwam itä.
Änkara Kiev häm Mäskäwne suğışnı söyläşülär aşa tuqtatırğa çaqıra, häm Törkiyä tınıçlıq öçen nigez salu maqsatında teläsä-nindi initsiativa, şul isäptän, aradaşçılıq öçen äzer.
Zelenskiy belän oçraşu
Soñraq Tramp Ukraina Prezidentı Volodimir Zelenskiy belän comğa könne Aq Yortta oçraşaçağın rasladı.
AQŞ liderı jurnalistnıñ Ukraina liderın comğa könne Aq Yortta qabul itü belän bäyle sorawğa cawap birgändä: “Minemçä, äye,” – dide.
Şul uq könne Zelenskiy Ukraina delegatsiyäseneñ AQŞqa berniçä oçraşu öçen kitüen äytte, häm ul comğa könne Tramp belän oçraşaçağın belderde.
“Minem Vaşingtonğa barıp, comğa könne ilbaşı Tramp belän oçraşu mömkinlegem bulaçaq,” – dide Zelenskiy “X” platformasında.
“Min berniçä adım täqdim itärgä cıyınam, häm bezneñ söyläşülär häm yärdäm öçen ilbaşı Trampqa räxmätlemen.”
Ul säfäreneñ töp maqsatı hawa saqlanu häm ozın aralıqqa atu mömkinleklärenä bağışlanuın belderep: “Rusiyägä tınıçlıq maqsatında basım yasaw öçen” - dip äytte.
