Törkiyä ilbaşı Räcäp Tayyip Ärdoğan çärşämbä könne Törkiyäneñ Şanxay xezmättäşlek oyışmasına (ŞXO) quşılu tırışlıqları Könbatışqa arqası belän borılu digänne añlatmıy, dip belderde.

Qırğızstannıñ Bişkäk şähärendä uzğan ŞXO däwlät başlıqları sammitınnan qaytıp kilüçe ilbaşı oçqıçında jurnalistlar belän äñgämädä Änkaranıñ kiñ tışqı säyäsät alıp baruın äytte.

Ärdoğan: "Bezneñ maqsattbız - 360 graduslı küzallaw belän üz yoğıntıbıznı arttıru", - dide.

Rusiyä-Ukraina suğışına qağılıp, Ärdoğan üzeneñ dä, Rusiyä ilbaşı Vladimir Putinnıñ da nizağnıñ mömkin qadär tizräk tınıç yul belän tämamlanuın teläwlären äytte.

Ul, şulay uq, Qara diñgezdä grajdanlıq diñgez transportın yaqlawnıñ möhimlegen assızıqladı, konfliktlar xalıq iminlegenä häm kommertsiyä êşçänlegenä qurqınıç tudıra torğan noqtağa çitmäskä tiyeş, dide.

Ärdoğan, biğräk tä, Afrikada aşlıq krizisınıñ yañadan kütärelüe turında kisätte, problema naçarayğançı çaralar kürü faydalı bulaçağın äytte.