Qatar uzğan atnada Doxada “Xamas” liderların nişan itep alğan İzrail höcümenä cawap itep sammitqa çaqırdı. Höcüm näticäsendä 5 “Xamas” räsmiye häm 1 Qatar iminlek xezmätkäre hälaq bulğan ide.
Törkiyä ilbaşı Räcäp Täyyip Ärdoğan düşämbe könne Qatarga säfär qıldı. Ärdoğan bu säfär qısalarında uzğan atnada İzrailneñ Doxağa oyıştırğan höcümennän soñ çirattan tış ütkärelgän Ğäräp–İslam sammitında qatnaşa.
İlbaşı Ärdoğannıñ bu säfärendä xäläl cefete Äminä Ärdoğan, milli küzläw oyışması başlığı İbrahim Qalın, ilbaşınıñ tışqı säyäsät häm iminlek baş kiñäşçese Akif Çağatay Qılıç, êlemtä başlığı Burhanettin Duran, “Ğadellek häm üseş” partiyäse başlıq urınbasarı Xalit Yerebakan da qatnaşa.
Ğaräp–İslam sammitı töbäktäge däwlät başlıqların häm yuğarı däräcäle räsmi zatlarnı bergä oçraştıra.
Sammit oyıştıru çaqıruın uzğan atnada “Xamas” liderların nişan itep alğan häm 5 “Xamas” räsmiye belän 1 Qatar iminlek xezmätkäreneñ ğomeren özgän İzrail höcümennän soñ Qatar tarafınnan yasaldı.
Qatar prem’yer-ministrı häm tışqı êşlär ministrı Şäyex Möxämmäd bin Abdurraxman Äl Sani yäkşämbe uzdırılğan cıyılışta:
— “Xalıqara cämägat’çelek ikele standart qullanunı tuqtatırğa häm İzrailne barlıq cınayät’läre öçen cäzağa tartırğa tiyeş”, — dip belderde.
Äl Sani şulay uq:
“Bu rejim Qatar, Livan, Ğıyraq, İran häm Yämänne dä kertep küp kenä İslam ilenä höcüm itte. Ul telägänen êşli, qızğanıç, AQŞ häm Awrupa illäre dä bu ğamällärne yaqlıy,” — dip östäde.
Qatar AQŞ häm Mısır belän bergä İzrailneñ 2023 nçe yılnıñ oktyabrennän birle Gazzädä alıp barğan häm yaqınça 65 meñ fälästinleneñ ğomeren özgän suğışnı tuqtatu öçen alıp barılğan söyläşülärdä aradaşçı rolen başqara.
