Ukrainanıñ êçke êşlär ministrı, kiçä kön buyı däwam itkän Rusiyä höcümnärendä 14 keşeneñ ülüen häm 60qa yaqın keşeneñ yaralanuın belderde.

İgor’ Klimenko, düşämbe könne Telegram-kanalda yasağan açıqlawında, Rusiyä köçläreneñ Ukrainanıñ cide töbägenä 70tän artıq höcüm oyıştıruın häm Xar’kovtağı Merefa rayonınıñ iñ küp zarar kürgän urın buluın äytte.

Klimenko üz belderüendä şunı da östäde: "Şul uq waqıtta Rusiyä ênergetika tarmağına höcüm itüne däwam itä. Bügen Dnepropetrovsk, Xar’kov häm Çernigov töbäklärenä bärdelär. Bu - oçraqlı höcümnär tügel, ä tınıç xalıqnı terrorlawğa yünältelgän maxsus taktikalar."

Ukrainanıñ däwlät ênergiya şirkäte “Naftogaz” soñğı täwlek êçendä Sumı häm Xarkov töbäklärendäge biş obyektka höcüm oyıştırıluın xäbär itte.

Şirkät Telegram-kanalda yasağan belderüendä: “Cihazlarnıñ zarar kürüe säbäple citeşterü barışların tuqtatırğa mäcbür buldıq," — dip äytte häm bu xäldän soñ qışqa äzerlekneñ awırlaşuın belderde.

Rusiyä älegä Ukranianıñ bu däğwalarına cawap birmäde. Däwam itüçe suğış säbäple bu mäglümatlarnı bäysez räweştä raslaw qıyın.

Mäskäw citäkçelege här yıl ütkärelä torğan 9 may Ciñü köne uñayınnan 8-9 may könnärendä Ukraina belän ber yaqlı utnı tuqtatunı iğlan itte.