Törkiyä tışqı êşlär ministrı Xaqan Fidan: “Bez CICA äğzası bulğan Fälästinneñ xoquqların yaqlawda, däwam itüçe zolımğa häm citdi xoquq bozularğa qarşı nıqlı totış kürsätergä tiyeşbez. Daimi çişeleş 1967 yılğı çiklär nigezendä, başqalası Könçığış Qodüs bulğan bäysez häm suveren Fälästin däwläte tözüne taläp itä”, - dide.

Xaqan Fidan Törkiyä ilbaşı Räcäp Täyyip Ärdoğan isemennän qatnaşqan Aziyädä xezmättäşlek häm ışanıç arttıruçı çaralar konferenśiyäseneñ (CICA)  7nçe sammitında çığış yasadı.

Aziyanıñ kütärelüe belän bilgelängän çorda tınıçlıq häm mullıqnı täêmin itü öçen CICA oyışmasınıñ tağın da köçle buluı zarurlığın assızıqlağan Fidan bolay dide:

“Törkiyä bularaq bez CICAnı Aziyaneñ iñ kiñ qolaçlı iminlek forumı itärgä tırışabız. Bu qısada transport bäyläneşlären kiñäytep häm ênergetika koridorların törleländerеp, iqtisadi iminlekne arttırırğa häm bäyläneşlärne üsterergä tiyeşbez”.

Dönyadağı krizislarnıñ artuı xalıqara platformalarda bilgesezlekneñ artuına kiterüen kisätkän Fidan, urtaq problemalarnı kollektiv räweştä çişü yulların tabuğa ixtıyacnıñ, başqa waqıtlarga qarağanda, tağın da aktual’ buluın belderde.

Xaqan Fidan tınıçlıqqa häm üzara ışanıçqa tuğrılıqnıñ härber äğza öçen dä urtaq bulırğa tiyeşlegenä basım yasadı.

“CICA äğzası bulğan İzrail Fälästin xalqınıñ töp xoquqların sistemalı räweştä basım yasaw säyäsäte alıp barıp boza ikän, bez bu tuğrılıqnı saqlap qala almıybız” digän Fidan süzen bolay dip däwam itte:

“CICA äğzası bulğan Fälästinneñ xoquqların yaqlawda, däwam itüçe zolımğa häm citdi xoquq bozularğa qarşı qatğıy totış kürsätergä tiyeşbez. Daimi çişeleş 1967 yılğı çiklär nigezendä, başqalası Könçığış Qodüs bulğan bäysez häm suveren Fälästin däwläte tözüne taläp itä”.

Tışqı êşlär ministrı sammitnıñ qıytğa külämendä totrıqlı tınıçlıqqa häm mullıqnı arttıruğa yünältelgän  tağın da näticäle CICA öçen açıq häm töğäl yul kartasın bilgelärgä tiyeşlegen assızıqladı.