Rusiyäneñ Gavanadağı tulı xoquqlı ilçese pänceşämbe könne yasağan belderüendä AQŞnıñ bu Karib utrawına neft satuçı illärgä basımın arttıruına häm Gavananı AQŞnıñ milli iminlege öçen yanaw dip atawına qaramastan, Kubanı alğa taba da neft belän täêmin itäçäklären äytte. Rusiyä ilçese Viktor Koronelli "RİA" däwlät xäbär agentlığına birgän intervyusında Mäskäwneñ Kuba belän ozan yıllar däwam itüçe ênergiyä bäyläneşläre buluın belderep: "Bu praktikabıznıñ däwam itäçägen uylıybız," dip äytte.
Rusiyä bu wäğdäne AQŞnıñ Kubağa qarşı artqan diplomatik häm iqtisadi basımı däwerendä yasadı. AQŞ ilbaşı Donald Tramp uzğan atnada Kuba belän bäyle milli ğadättän tış xäl iğlan itte, utraw xökümäten "ğädättän tış häm kürelmägän yanaw" dip atadı häm Gavanağa neft birüçe teläsä qaysı ilgä tamgaxanä salımnarı qullanaçaqların belderde. AQŞnıñ Kuba citäkçelegen izolätsiyäläw häm ênergiyägä ireşüen çikläw maqsatın quyğan bu agressiv säyäsät moña qadar bulğan neft çeltärlären xäzerdän ük qaqşattı.
Venesuêla neft tapşırunı tuqtattı
Tarixi yaqtan Kubanıñ iñ zur täêminatçısı bulğan Venesuêla AQŞ basımı astında neft tapşırunı tuqtattı. Bu xäl utrawda kiñ külämle yağulıq qıtlığına, azıq-tölek häm transport bäyäläreneñ kisäk artuına, xättä başqala Gavanada da säğatlärçä däwam itkän êlektr özekleklärenä kiterde. Kuba xökümäte AQŞnıñ bu adımın gäyepläde. Räsmilär tamgaxanä salımnarı häm sanktsiyälär belän yanawnı utrawnıñ iqtisadın "buu" häm möstäqillegen qaqşatu tırışlığı dip bäyäläde.
AQŞ basımına qaramastan, çigenü yuq
Mäskäwneñ bu yañartılğan wäğdäse, Vaşington belän diplomatik kiyerenkelek artsa da, Rusiyäneñ Gavana belän bäyläneşlärenä birgän strategik ähämiyäten raslıy. Rusiyä häm Kuba yıllar däwamında ênergiyä ölkäsendä xezmättäşlek itä. Mäskäw moña qadar ikeyaqlı kileşülär qısasında utrawğa zur külämdä neft häm neft produktları täêmin itärgä kileşkän ide. Rusiyäneñ neft birüe waqıtlıça ciñellek tudırsa da, belgeçlär geosäyäsi basım artu häm traditsion täêminatçılarnıñ cibärüne çikläwe säbäple, Kubanıñ ğomumi ênergetika iminlegeneñ moxtac xäldä qaluın belderä.
