Ukraina ilbaşı Volodımır Zelenskiy, ileneñ yä abruyın, yäisä berlektäşen yuğaltaçaq yul çatında toruın äytep, AQŞnıñ suğışnı tuqtatu planına qarşı çıqtı.
Donald Tramp Ukrainaga kileşüne imzalarğa atnadan da kimräk waqıt birgännän soñ, Zelenskiy comğa könne kileşüneñ Ukrainanıñ mänfäğatlärenä “xıyanät itmäyäçäk' räweştä buluı öçen tırışıp êşlärgä wäğdä itte.
“Xäzer bezneñ tarixıbıznıñ iñ awır mizgellärennän bersen kiçeräbez,” — dip äytte Zelenskiy üz çığışında.
“Ukraina östendäge basım iñ awırlarınnan berse. Ukraina bik qıyın saylaw belän oçraşırğa mömkin: yä abruyın, yä möhim partnerın yuğaltu qurqınıçı,” — dip äytte ul Vaşington belän aralar bozılu turında kisätep.
Zelenskiy Trampnıñ 28 punktlı planına alternativalar täqdim itäçägen belderde.
Kiev häm anıñ Awrupa berlektäşläre bu täqdimgä şaqqattı. Ul Ukrainanı üz cirlären Rusiyägä birergä, armiyäsen qısqartırğa häm NATOğa kerüdän baş tartırğa êtärä.
Şul uq waqıtta, proyekt buyınça Rusiyä östämä cirlär alaçaq, dönya iqtisadına kire qaytaçaq häm G8 törkemenä qabat kerteläçäk.
Zelenskıy 2022 yılnıñ fevralendä Rusiyäneñ höcümenä Kievnıñ cawabın iskä töşerep, “Bez ul waqıtta Ukrainaga xıyanät itmädek, xäzer dä itmibiz,” dip äytte.
“Min argumentlar kiterep, ışandırıp, alternativalar täqdim itärmen,” — dip östäde ul.
Tramp isä comğa könne Ukrainanı üz planın qabul itärgä çaqırdı häm Kievtağı idaräneñ anı oşatırğa tiyeşlegen äytte.
“Alar qabul itäçäk, ägär qabul itmäsälär, suğışnı üzläre däwam itsen” - dip söyläde Tramp jurnalistlarga.
Awrupa illäre Ukrainaga yärdäm kürsätergä wäğdä birä
Zelenskıy AQŞ ilbaşı urınbasarı JD Vêns belän söyläşkännän soñ, Ukrainanıñ Trampnıñ suğışnı tämamlaw telägen “xörmät itüen” äytte.
Ul, şulay uq, protsessnıñ tışında qalğan Awrupa närsä êşlärgä belmägändä, Germaniya, Franśiya häm Böyekbritaniyä liderları belän telefon aşa aşığıç êlemtägä kerde.
Ukraina ilbaşı apparatı Zelenskiynıñ yaqın arada Tramp belän turıdan-turı söyläşergä niyätläwen citkerde.
Zelenskıy belän söyläşüdän soñ töp yaqlawçıları Böyekbritaniyä, Franśiya häm Germaniyä “tınıç häm ğädel tınıçlıqqa ireşü yulında Ukrainaga “totrıqlı häm tulı yaqlaw” kürsätäçäklären ışandırıp urtaq belderü citkerde.
